Gjatë orëve të mbrëmjes, Policia e Kosovës ka ndërmarrë aksione në Skenderaj dhe Vushtrri, ku ka konfiskuar tri armë zjarri dhe ka arrestuar tre persona të dyshuar për përdorim të armëve në mënyrë të paautorizuar.
Policia ka njoftuar se në Skenderaj, rreth orës 19:00, policia është njoftuar për të shtëna me armë në fshatin Klinë e Ulët, ku po mbahej një aheng familjar. Pas intervenimit, është identifikuar dhe arrestuar një i dyshuar, të cilit i është konfiskuar një pistoletë që dyshohet se e kishte përdorur gjatë festës.
Ndërkohë, në Vushtrri janë raportuar dy raste të ndara në fshatin Sllakofc. Rreth orës 21:00, një person dyshohet se kishte shtënë me armë nga një motor me katër rrota në lëvizje. Policia ka identifikuar të dyshuarin, e ka arrestuar dhe i ka konfiskuar një armë zjarri të llojit pistoletë. Në vendngjarje janë gjetur dhe sekuestruar 15 gëzhoja.
Po ashtu, rreth orës 21:30, policia ka reaguar ndaj një tjetër rasti të të shtënave në të njëjtin fshat, ku ishte duke u mbajtur një aheng familjar. Një person tjetër është arrestuar pasi kishte pranuar se kishte shtënë me armë në shenjë gëzimi. Policia ka konfiskuar armën dhe dy gëzhoja të tjera.
Për dy rastet që ndërlidhen me ahengjet familjare, janë iniciuar hetime për veprat penale “Mbajtje në pronësi, kontroll apo posedim të paautorizuar të armës” dhe “Përdorim i armës”, ndërsa të dyshuarit janë liruar në procedurë të rregullt me urdhër të prokurorit.
Ndërsa për rastin e të shtënave nga mjeti motorik, prokurori ka urdhëruar ndalimin policor prej 48 orësh për të dyshuarin dhe është iniciuar hetim për tri vepra penale: “Mbajtje pa leje e armës”, “Përdorim i armës” dhe “Shkaktim i rrezikut të përgjithshëm”.
Policia e Kosovës ka apeluar tek qytetarët që të përmbahen nga përdorimi i armëve gjatë ahengjeve apo në vende publike, duke rikujtuar se veprime të tilla përbëjnë rrezik serioz për sigurinë publike dhe janë të dënueshme me ligj
