Në një konferencë të përbashkët për media, Agjencia për Menaxhim të Emergjencave (AME) dhe Policia e Kosovës raportuan se gjatë ditëve të fundit në gjithë territorin e Kosovës janë regjistruar 633 zjarre, nga të cilat aktualisht 9 vatra janë aktive, ndërsa është duke vazhduar ndërkohë puna intensive për shuarjen dhe parandalimin e përhapjes së tyre.
Drejtori i AME-së, Genc Metaj, tha se shumica e zjarreve janë lokalizuar falë angazhimit të institucioneve, përfshirë edhe ndihmën e KFOR-it..
“Siç jeni duke u njoftuar, vendi po përballet me zjarre të shumta që po shfaqen në të gjithë territorin. Agjencia për Menaxhim të Emergjencave, në koordinim me njësitë zjarrfikëse në terren, qendrat operative emergjente, Ministrinë e Punëve të Brendshme, Policinë e Kosovës dhe autoritetet lokale, është angazhuar maksimalisht dhe po bën përpjekje maksimale për të adresuar çdo pasojë nga situata e krijuar. Vetëm gjatë javës së fundit janë raportuar mbi 633 zjarre”, tha ai .
Metaj sqaroi se gjatë kësaj jave, situata më e rënduar ka qenë në fshatrat Kqiq i Vogël, Zasellë, Meshinë, Tugjevc, Dumnicë, Merdare dhe Orllan, ku jeta e njerëzve ka qenë në rrezik serioz. “Me ndërhyrje profesionale, zjarret janë lokalizuar. Aktualisht kemi 9 vatra aktive, gjendja në vend është stabile, por e brishtë për shkak të temperaturave të larta”, shtoi ai.
Ndërsa, drejtori i Divizioni të komunikacionit rrugor në Policinë e Kosovës, Jeton Rexhepi tha se sa i përket zjarrvënieve janë arrestuar 23 persona për këto raste dhe në kuadër të hetimeve, Policia e Kosovës ka hapur 193 raste që lidhen me shkaktimin e rrezikut të përgjithshëm.
“Ne u bëjmë apel qytetarëve, veçanërisht atyre që frekuentojnë natyrën, të tregojnë kujdes maksimal sepse edhe një pakujdesi e vogël mund të shkaktojë zjarr me pasoja të mëdha. Çdo akt individual kujdesi është i rëndësishëm, veçanërisht gjatë periudhës me temperatura të larta”, tha ai.
