Radiotelevizioni i Kosovës (RTK) ka bashkëpunuar me televizionin publik japonez NHK në realizimin e një dokumentari që trajton dhunën seksuale të ushtruar nga forcat serbe gjatë luftës në Kosovë.
Drejtori i Televizionit, Rilind Gërvalla, tha se ky projekt nuk ishte thjesht një angazhim teknik apo institucional. Sipas Gërvallës, përtej funksionit të tij si transmetues publik, RTK e ktheu këtë projekt në një mision moral, duke ofruar jo vetëm burimet dhe kapacitetet e saj teknike, por edhe mbështetje të sinqertë për një kauzë të ndjeshme dhe të rëndësishme: mbrojtjen dhe promovimin e së vërtetës për dhunën seksuale të ushtruar nga forcat serbe gjatë luftës së Kosovës.
“Në nivel teknik e logjistik, RTK vuri në dispozicion të NHK-së gjithçka që kërkohej për një prodhim serioz: nga pajisjet profesionale të xhirimit dhe montazhit, tek ekipi i përkushtuar i gazetarëve, ngasësve, kameramanëve dhe teknikëve. Ky bashkëpunim u zhvillua me standarde të larta ndërkombëtare, duke garantuar që materiali të kishte cilësi të denjë për një audiencë globale”, ka shkruar Gërvalla në Facebook, pasi dokumentari që sjell në dritë të vërtetën dhe dhimbjen e Kosovës gjatë luftës, me rrëfimin e mbijetuares së dhunës seksuale, Vasfije Krasniqi Goodman, është shpërblyer me çmimin “Motivues” nga juria prestigjioze e Japonisë.
Ai theksoi se veçantia e kësaj nisme qëndron te pozicionimi i RTK-së si aktor aktiv në përhapjen e së vërtetës dhe sensibilizimin për një plagë të rëndë shoqërore. Sipas Gërvallës, duke ofruar mbështetje për realizimin e këtij dokumentari, RTK bëri një hap të guximshëm në ruajtjen e kujtesës kolektive dhe në mbrojtjen e dinjitetit të të mbijetuarave dhe të mbijetuarve.
“Në një kontekst ku shpesh viktimat e dhunës seksuale janë përballur me stigmatizim dhe heshtje shoqërore, ky veprim i jep zë atyre që për dekada janë ndjerë të padukshëm”, shtoi Gërvalla.
Tutje ai theksoi se fakti që ky projekt u realizua në bashkëpunim me NHK-në, një media me reputacion global, e rrit peshën e tij shumëfish.
“Historia e dhunës seksuale në Kosovë nuk mbetet më vetëm në kornizat e debatit lokal; ajo bëhet pjesë e ndërgjegjes ndërkombëtare. Në këtë mënyrë, dokumentari nuk është vetëm një produkt mediatik, por edhe një mjet diplomatik i fuqishëm për të sfiduar narrativat që mohojnë apo relativizojnë krimet e kryera nga forcat serbe”, nënvizoi drejtori i Televizionit në RTK.
Ai vuri në pah se roli i mediave publike si RTK nuk kufizohet në raportimin e lajmeve të ditës, por edhe në ruajtjen e historisë së një populli.
“Me këtë projekt, RTK dëshmon se është e gatshme të shkojë përtej kufijve të detyrës së zakonshme, duke u bërë mbrojtëse e kujtesës dhe e të vërtetës. Në këtë rast, transmetuesi publik nuk ishte vetëm kronist i ngjarjeve, por pjesëmarrës aktiv në një proces të rëndësishëm shoqëror dhe historik. Prandaj, nisma për të mbështetur NHK-në në realizimin e këtij dokumentari nuk është një episod i zakonshëm bashkëpunimi mediatik; është një dëshmi e qartë e ndërthurjes mes profesionalizmit dhe humanizmit. RTK tregoi se media publike mund të jetë një instrument i drejtësisë historike, duke i dhënë zë të mbijetuarave dhe duke e përballur botën me një realitet që nuk guxon të harrohet”, ka përfunduar Gërvalla.
