Gjykata Kushtetuese e Republikës së Kosovës ka vendosur se paragrafi 1 i nenit 11 të Statutit të Shërbimit Spitalor dhe Klinik Universitar të Kosovës (ShSKUK) i miratuar nga Qeveria më 27 dhjetor 2023, është në kundërshtim me Kushtetutën.
Vendimi u mor pas kërkesës së Avokatit të Popullit, i cili kishte kontestuar përjashtimin e shërbimeve të kujdesit mendor nga spitalet e përgjithshme.
Gjykata konstatoi se kjo dispozitë bie ndesh me nenin 51 të Kushtetutës (“Mbrojtja Shëndetësore dhe Sociale”), në lidhje me nenin 7 (“Vlerat”) dhe nenin 92 (“Parimet e Përgjithshme”), duke kufizuar të drejtën e qytetarëve për kujdes shëndetësor, e cila me ligj përfshin edhe shërbimet e kujdesit mendor në nivel dytësor.
Aktgjykimi urdhëron Qeverinë që të ndryshojë nenin 11 të Statutit, në përputhje me Kushtetutën dhe legjislacionin në fuqi, ndërsa deri në ndryshimin e tij spitalet e përgjithshme duhet të ofrojnë shërbimet e kujdesit mendor.
Avokati i Popullit kishte argumentuar se kufizimi i shërbimeve për kujdes mendor dëmton qytetarët dhe redukton stafin mjekësor e administrativ, në kundërshtim me Ligjin për Shëndetin Mendor dhe Ligjin për Shëndetësinë.
Pretendimet e tij u mbështetën nga deputeti Armend Zemaj, Federata e Sindikatave të Shëndetësisë dhe Oda e Mjekëve të Kosovës, ndërsa u kundërshtuan nga Qeveria e Kosovës. Gjykata theksoi se Qeveria ka kompetencë të nxjerrë akte juridike vetëm në pajtim me Kushtetutën dhe ligjet, gjë që nuk është respektuar në këtë rast.
