Shtatë prej organizatave më të rëndësishme të biznesit në Kosovë kanë shprehur shqetësim të thellë lidhur me situatën e krijuar pas aktvendimit të Shkallës së Dytë të Gjykatës Komerciale dhe paralajmërimet për ndërprerje të furnizimit me energji për bizneset nga data 16 gusht.
Dhoma e Tregtisë dhe Industrisë e Kosovës, Oda Ekonomike e Kosovës, Oda Ekonomike Amerikane në Kosovë, Oda Ekonomike Gjermano-Kosovare, Oda Ekonomike Britanike në Kosovë, Lidhja e Bizneseve të Kosovës dhe Oda e Hotelerisë dhe Turizmit të Kosovës përmes një deklarate të përbashkët kanë kërkuar nga Zyra e Rregullatorit për Energji (ZRRE) rishqyrtimin e procesit të liberalizimit të tregut të energjisë elektrike, duke paralajmëruar pasoja serioze për ekonominë e vendit.
“Odat kërkojnë që të mos aplikohet ndërprerja e furnizimit me energji për bizneset, siç është paralajmëruar të nisë nga data 16 gusht. Ky vendim do të kishte pasoja të jashtëzakonshme, përfshirë uljen e punësimit, rritjen e çmimeve, rritjen e importit dhe rënien e eksportit”, thuhet në reagim.
Sipas organizatave të biznesit, tashmë disa kompani kanë ndërprerë punën, ndërsa të tjera janë në proces të mbylljes së reparteve. Po ashtu, janë evidentuar dëme të konsiderueshme për shkak të kontratave ndërkombëtare që janë bërë të papërballueshme për shkak të rritjes së çmimit të energjisë.
“Askush nuk është kundër liberalizimit të tregut të energjisë, por kundërshtohet forma e zgjedhur nga ZRRE, e cila është realizuar pa informim të mirëfilltë dhe pa transparencë ndaj bizneseve”, thuhet më tej në reagimin e përbashkët.
Sipas tyre, çmimet e ofruara aktualisht nga furnizuesit e licencuar janë shumëfish më të larta se ato në rajon, çka po e dëmton rëndë konkurrueshmërinë e bizneseve vendore.
