Prokuroria Speciale e Republikës së Kosovës ka ngritur dy aktakuza të ndara në Gjykatën Themelore në Prishtinë ndaj M.M. dhe A.B., për veprën penale “Nxitje e përçarjes dhe mosdurimit”.
Sipas aktakuzës, të pandehurit akuzohen se kanë nxitur dhe përhapur publikisht urrejtje e mosdurim midis grupeve fetare, duke propaganduar ideologji ekstremiste fetare në përputhje me metodat e propagandës së ISIS-it.
Në rastin e parë, M.M. akuzohet se ka bërë thirrje për masakra ndaj hebrenjve dhe të krishterëve, duke publikuar në rrjetin social “Facebook” foto dhe video të personave të radikalizuar, si dhe duke shpërndarë thirrje për ekstremizëm fetar.
Ndërsa në rastin e dytë, A.B. akuzohet se ka bërë thirrje për respektimin e ligjeve të Sheriatit, kundërshtimin e sistemit demokratik dhe të simboleve shtetërore të Republikës së Kosovës. Gjithashtu, sipas aktakuzës, A.B. nga viti 2019 deri më 22 maj 2025, në profilin e tij në “Facebook” me emrin “Ubejdullah Abu Suhejla”, ka shpërndarë materiale nxitëse, duke bërë thirrje për t’iu bashkuar luftës për xhihad.
Prokuroria Speciale ka theksuar se këto vepra penale përbëjnë kërcënim serioz për vlerat demokratike dhe bashkëjetesën ndërmjet grupeve etnike e fetare në Kosovë, duke riafirmuar përkushtimin e saj për ndjekjen dhe hetimin e autorëve të tillë.
