Pamjet tregojnë aktivitet të shtuar në vendin e testimit Pankovo, në arkipelagun Novaya Zemlya në Detin Barents, duke përfshirë rritje të personelit, pajisjeve, anijeve dhe avionëve të lidhur me testet e mëparshme të raketës 9M730 Burevestnik (Stuhia Petrel).
Një imazh satelitor tregon pajisjet në vendin e testimit Pankovo në ishullin Yuzhny, në arkipelagun Novaya Zemlya në Detin Barents, Rusi, më 7 gusht 2025. (Foto: Reuters)
“Po shohim të gjithë aktivitetin në poligonin e hedhjes — sasi të mëdha furnizimesh që po dorëzohen për të mbështetur operacionet, si dhe lëvizje në vendin e lëshimit”, tha Lewis.
Një burim perëndimor i sigurisë, i cili kërkoi të mos identifikohej, konfirmoi për Reuters se Rusia po përgatitet të testojë Burevestnik-un. Sipas Lewis, testi mund të kryhet që këtë javë, gjë që mund të eklipsojë samitin Trump-Putin në Alaska.
Shtëpia e Bardhë nuk komentoi mbi mundësinë e testimit, dhe Pentagoni, CIA dhe Ministria Ruse e Mbrojtjes refuzuan të komentojnë. Putin më parë ka pohuar se arma, të cilën NATO e quan SSC-X-9 Skyfall, është “e pamposhtur” kundër sistemeve aktuale dhe të ardhshme anti-raketë, me një rreze veprimi pothuajse të pakufizuar dhe një trajektore të paparashikueshme.
Sipas ekspertëve, zhvillimi i kësaj rakete fitoi rëndësi për Moskën pasi Trump njoftoi në janar projektin amerikan “Kupola e Artë” – një mburojë e përmirësuar kundër raketave balistike. Megjithatë, shumë analistë dyshojnë se Burevestnik mund t’i shmangë plotësisht mbrojtjet dhe paralajmërojnë për rrezikun e përhapjes së rrezatimit përgjatë rrugës së fluturimit.
Një imazh satelitor tregon pajisjet në vendin e testimit Pankovo në ishullin Yuzhny, në arkipelagun Novaya Zemlya në Detin Barents, Rusi, më 7 gusht 2025. (Foto: Reuters)
Të dhënat nga organizata joqeveritare Nuclear Threat Initiative tregojnë se Burevestnik ka një histori të keqe testimi – nga 13 përpjekje të njohura, u regjistruan vetëm dy suksese të pjesshme.
Sipas imazheve satelitore, kontejnerë, pajisje dhe personel kanë mbërritur në Pankov që nga fundi i korrikut. Që nga mesi i korrikut, në aeroportin ushtarak të Rogaçevës ka pasur dy aeroplanë specialë me kupola radari, të destinuar për mbledhjen e të dhënave gjatë testeve. U vunë re të paktën pesë anije të lidhura me testet e mëparshme, dhe sipas të dhënave nga VesselFinder.com, anija mallrash Teriberka, e përdorur në testet e mëparshme, ishte në rrugën e saj për në Nova Zemlja të martën.
Ushtria norvegjeze njoftoi se Deti Barents është “vendi kryesor për testet e raketave ruse” dhe se ka indikacione për përgatitje për aktivitete të reja, por nuk specifikoi llojin e armëve.
Pamjet nga korriku dhe gushti tregojnë strehën mbrojtëse që lëviz nga platforma e lëshimit, gjë që studiuesit thonë se është një shenjë e qartë e testimit të afërt. “Gjithçka po shkon përpara me shpejtësi të plotë”, përfundoi Lewis.
