Policia e Kosovës nga rajoni i Gjilanit ka bërë të ditur se gjatë një operacioni të gjerë policor, i zhvilluar në periudhën 13 maj – 13 gusht 2025, ka arritur të lokalizojë dhe arrestojë 21 persona të shpallur në kërkim nga gjykatat e Kosovës.
Ky aksion është realizuar në zbatim të planit operativ për ekzekutimin e urdhëresave gjyqësore, përmes një task-force të veçantë të formuar nga Policia e Gjilanit, me qëllim forcimin e rendit dhe sigurisë publike.
Personat e arrestuar janë dënuar me masa burgimi nga 1 (një) deri në 5 (pesë) vite e 6 (gjashtë) muaj, për një sërë veprash penale si: Vrasje në tentativë; Trafikim me njerëz; Shkaktim i rrezikut të përgjithshëm; Blerje, posedim, shpërndarje dhe shitje e paautorizuar e narkotikëve; Bashkësi jashtëmartesore me person nën moshën 16 vjeç dhe; Vjedhje dhe Vjedhje të rënda, si dhe vepra të tjera penale.
Pas kryerjes së procedurave ligjore, të gjithë të arrestuarit janë dërguar për ta vuajtur dënimin, njofton policia.
Policia e Gjilanit ka njoftuar se veprime të tilla do të vazhdojnë edhe më tej, me qëllim lokalizimin dhe arrestimin e personave të tjerë që vazhdojnë t’i shmangen drejtësisë.
