Prokuroria Speciale ka dorëzuar sot në Gjykatën Themelore në Prishtinë aktakuzën ndaj 21 të pandehurve për krime lufte kundër popullatës civile gjatë luftës së vitit 1999 në Kosovë. Një gjë të tillë e ka bërë të ditur Kryeprokurori i Prokurorisë Speciale, Blerim Isufaj në një konferencë për media, teksa për shkak të ndjeshmërisë së çështjes nuk janë dhënë emrat e të pandehurve.
“Sot e kemi dorëzuar në gjykatë aktakuzën që përfaqëson një hap të rëndësishëm drejt vendosjes së drejtësisë dhe përgjegjësisë për vuajtjet që janë shkaktuar gjatë luftës në Kosovë. Është bërë një punë e madhe dhe e përkushtuar për të siguruar që aktakuza të mbështetet në prova përtej çdo dyshimi të bazuar mirë, pavarësisht se ajo është ngritur në mungesë të pandehurve”, ka thënë Isufaj, i cili për detaje tjera ia kanë lënë fjalën prokurorit të rastit, Atdhe Dema.
E ky i fundit ka thënë se pas vite hetimesh intensive në këtë rast, përfundimisht sot, e kanë dërguar një aktakuzë në Gjykatën Themelore në Prishtinë në Departamentin Special.
“Dëshiroj të ju njoftoj se kjo akuzë është ngritur për krime lufte kundër popullatës civile, e cila lidhet me ngjarjet e ndodhura gjatë periudhës janar-qershor 1999 në territorin e Kosovës në kuadër të konfliktit të armatosur dhe luftës që ka ndodhur atëherë. Sipas provave të mbledhura gjatë hetimeve paraprake, ekziston dyshimi i bazuar mirë se të pandehurit janë 21, duke ushtruar kontroll dhe autoritet efektiv në forcat e armatosura në zonat përkatëse në tërë territorin e Kosovës. Pra, bëhet fjalë për ushtrinë e atëhershme të Republikës Federale të Jugosllavisë dhe Policinë e Serbisë”, ka thënë Dema.
Ai tutje tha se të pandehurit kanë pasur dijeni apo arsye të mjaftueshme për të ditur se pjesëtarët e atyre forcave kanë kryer veprime të ndaluara rreptësisht nga e drejta ndërkombëtare humanitare.
“Këto veprime përfshijnë shkatërrimin sistematik të pronës civile, përfshirë djegien e shtëpive dhe infrastrukturës, sulme të drejtpërdrejta ndaj civilëve dhe vendbanimeve të tyre, përndjekje dhe ndalime arbitrare për arsye etnike, e që në fund kanë rezultuar me dëbim të detyruar masiv të popullsisë shqiptare drejt shteteve fqinje”, ka shtuar prokurori i rastit.
Sipas aktakuzës, këto veprime përbëjnë pjesë të një fushate të gjerë, që ka rezultuar me zhvendosje me dhunë të rreth 863 mijë civilëve shqiptarë sipas statistikave zyrtare.
“Prokuroria vlerëson se të pandehurit në pozitën dhe funksionin që kanë ushtruar kanë dështuar të marrin masat e nevojshme dhe të arsyeshme për të parandaluar këto krime. Kanë dështuar për të ndëshkuar autorët e tyre si dhe kanë dështuar për t’i raportuar ato te autoritetet më të larta, ndonëse kishin kompetenca ligjore dhe funksionale për të ndërmarrë apo për të bërë një veprim të këtillë”, ka nënvizuar Dema.
“Aktakuza të pandehurit i ngarkon në bazë të nenin 142 të Ligjit Penal të ish-Republikës Federale të Jugosllavisë, ligje atëherë në fuqi, i cili sanksionon krimet e luftës kundër popullatës civile si dhe në harmoni me të drejtën ndërkombëtare humanitar,e përfshirë Konventat e Gjenevës dhe protokollet shtesë. Prokuroria mbetet e përkushtuar në zbardhjen e plotë të së vërtetës, në mbrojtjen e viktimave dhe në sigurimin e drejtësisë për të gjitha palët. Hetimet tona kanë qenë të pavarura, profesionale dhe të mbështetura në prova konkrete”, ka theksuar Dema.
Ai ka thënë se për shkak të ndjeshmërisë së çështjes dhe për të mos ndikuar në procesin gjyqësor, nuk mund të jap më shumë detaje në këtë fazë, për çka ka kërkuar mirëkuptimin e medieve.
Dema ka thënë se kanë bërë urdhërarrest ndërkombëtar me kohë për të pandehurit, por deri në këtë moment të njëjtit janë të paarritshëm për prokurorinë.
