Sindikata e Punëtorëve të Radio Televizionit të Kosovës (SPERTK) ka njoftuar anulimin e protestës së paralajmëruar për datën 18 gusht, pasi Qeveria në detyrë ka miratuar në parim kërkesën për huamarrje, për daljen nga kriza financiare në RTK.
“Sindikata mirëpret vendimin e Qeverisë së Kosovës për ndarjen e mjeteve buxhetore që do t’i mundësojnë RTK-së të dalë nga kriza aktuale financiare. Në këtë drejtim, njoftojmë se protesta e paraparë për datën 18 gusht anulohet”, thuhet në njoftimin e SPERTK-së.
Sindikata ka falënderuar të gjithë punonjësit e RTK-së për gatishmërinë dhe angazhimin në protestat dhe veprimet sindikale të ndërmarra gjatë javëve të fundit. “Një mirënjohje e veçantë shkon për të gjithë ata kolegë që, pavarësisht se nuk morën paga për muaj të tërë, vazhduan punën me përkushtim për të mos lënë qytetarët pa informim, duke mbrojtur kështu misionin themelor të transmetuesit publik”, thuhet më tej.
SPERTK ka shprehur mirënjohje edhe për organizatat dhe sindikatat që u solidarizuan me punonjësit e RTK-së. “Falënderojmë gjithashtu Asociacionin e Gazetarëve të Kosovës (AGK), Bashkimin e Sindikatave të Pavarura të Kosovës (BSPK), Federatën Evropiane të Gazetarëve (EFJ), mbi 15 milionë sindikalistë në SHBA, Qendrën Solidare, Sindikatën e Gazetarëve dhe Punonjësve të Medias në Shqipëri (SGPM), si dhe të gjitha mediat dhe kolegët në Shqipëri që u solidarizuan dhe mbështetën SPERTK-në.”
Sindikata rithekson se qëllimi i saj i vetëm ka qenë mbrojtja e transmetuesit publik dhe garantimi i pagave për punëtorët e saj. “Qëllimi ynë i vetëm ka qenë dhe mbetet mbrojtja e RTK-së, sigurimi i buxhetit dhe garantimi i pagave për punëtorët e saj.”
SPERTK i ka bërë thirrje Kuvendit të Republikës së Kosovës për miratimin urgjent të Ligjit të ri për RTK-në. “I bëjmë thirrje Kuvendit të ri të Republikës së Kosovës që me urgjencë të miratojë Ligjin e ri për RTK-në, të sigurojë financim të pavarur, rritje të buxhetit dhe ndryshim të formës së raportimit financiar një herë në vit për shpenzimet buxhetore”, theksohet në njoftim.
Gjithashtu, sindikata kërkon që, në mungesë të Kuvendit, kompetencat për ndarjen e buxhetit të RTK-së të kalojnë edhe te Thesari. “Kërkojmë që në rast mungese të Kuvendit të Kosovës, e drejta për ndarjen dhe alokimin e buxhetit të RTK-së të kalojë jo vetëm te Komisioni për Buxhet dhe Transfere, por edhe te Thesari, sipas ligjit, për të shmangur situata si kjo që sapo kaluam.”
SPERTK ka kërkuar edhe plotësimin e Bordit të RTK-së dhe të gjitha pozitave udhëheqëse në përputhje me ligjin: “Kërkojmë nga Kuvendi i ri plotësimin e Bordit të RTK-së dhe të gjitha pozitave udhëheqëse në përputhje me ligjin për RTK-në, si dhe mbështetje të seriozë për transmetuesin publik në funksion të forcimit të tij.”
Sipas sindikatës, “forcimi i RTK-së është forcim i lirisë së medias në një vend demokratik si Kosova.”
Në fund, SPERTK ka njoftuar se të gjitha dokumentet e mbledhura për padi, me pëlqimin e punonjësve, do të asgjësohen sipas ligjit për mbrojtjen e të dhënave personale dhe se padia nuk do të dërgohet në gjykatë.
