Presidenti amerikan, Donald Trump, ka deklaruar se tanimë i takon presidentit ukrainas Volodymyr Zelensky të bëjë një marrëveshje për t’i dhënë fund luftës me Rusinë.
Trump tha se së shpejti do të caktohet një takim midis presidentit ukrainas, Zelensky dhe atij rus, Putin ndërsa konfirmoi që do të jetë edhe ai i pranishëm.
Trump i bëri këto komente gjatë një interviste për Fox News pas takimit me Putinin në Alaskë.
“Duhet të bëhet një marrëveshje. Po. Shikoni, Rusia është një fuqi shumë e madhe, dhe ata nuk janë. Tani i takon Presidentit Zelensky ta përfundojë këtë. Ata do të caktojnë një takim tani midis Presidentit Zelensky, Presidentit Putin dhe meje, mendoj”, tha ai.
Gjatë intervistës, Trump nuk pranoi të jepte detaje mbi çështjet e fundit që po pengojnë një marrëveshje, duke thënë vetëm se dëshiron “të shohë se çfarë mund të bëjmë”.
Por, pavarësisht se nuk arritën një marrëveshje, ai e cilësoi samitin si një sukses.
“Dua të sigurohem që kjo të përfundojë. Dhe kemi një shans mjaft të mirë për ta përfunduar”, shtoi ai.
Presidenti amerikan, Donald Trump, dhe ai rus, Vladimir Putin, nuk dolën me një marrëveshje nga samiti i Alaskës, por të dy liderët theksuan se është bërë përparim në bisedimet për arritjen e paqes në Ukrainë.
Pas takimit, Presidenti Trump pati një telefonatë të gjatë me Presidentin e Ukrainës, Volodymyr Zelensky, gjatë fluturimit për në Uashington DC, tha sekretarja e shtypit e Shtëpisë së Bardhë, Karoline Leavitt.
Sipas Shtëpisë së Bardhë, pas përfundimit të bisedës me Zelenskyy, Trump ka zhvilluar gjithashtu telefonata me disa udhëheqës të vendeve anëtare të NATO-s.
