Policia e Kosovës ka arrestuar një person të dyshuar për veprën penale “Vjedhje e rëndë” në komunën e Zubin Potokut.
Sipas Policisë, ngjarja ka ndodhur më 16 gusht 2025, rreth orës 22:15, në fshatin Prelez, ku njësitë policore gjatë patrullimeve të rregullta kanë hasur në një kabllo të energjisë elektrike të këputur qëllimisht.
“Policia ka siguruar perimetrin e vendngjarjes dhe ka gjetur disa pajisje që dyshohet se janë përdorur për dëmtimin e kabllos. Gjatë kontrollit të zonës, është arrestuar S.S., 29 vjeç, si i dyshuar për përfshirje në rast”, thuhet në njoftim.
Me urdhër të Prokurorit të Shtetit, i dyshuari është ndaluar për 48 orë, ndërsa hetimet vazhdojnë. Policia ka identifikuar edhe dy persona të tjerë që dyshohet se janë të përfshirë në këtë rast dhe aktualisht janë në kërkim.
