Qytetaret në kryeqytet ankohen për disa linja të autobusëve që nuk po i respektojnë oraret. Kurse drejtuesit e këtyre linjave vonesën e arsyetojnë me kolonat ne kryeqytet. Ndërkaq, nga Drejtoria e Mobilitetit thonë se këta operatorë ndodhen në fazën e tranzicionit për kompletimin e flotës sipas standardeve evropiane.
Qytetaret e Prishtinës të cilët shfrytëzojnë linjat e autobusëve urbanë në kryeqytet, janë ankuar pasi disa nga linjat nuk i respektojnë oraret dhe se kjo gjendje po paraqet shqetësim për disa prej tyre. Disa qytetarë të intervistuar nga Radio Kosova, thonë se autobusët që vijnë për në qendër, shpesh vonohen deri në një orë. Kjo vonesë e theksuar është një shqetësim i vazhdueshëm, dhe qytetarët janë të pakënaqur me këtë situatë:
“Le t’i respektojnë oraret jo duke i dëmtuar qytetaret, të cilët presin me orës të tëra në stacion. Jemi nëpër puna, na bëhet vonë, na shkaktojnë vonesa edhe në oraret e punës. Autobusi me nr. 6, linja nga Veterriku në qendër, ka vonesa deri 40 minuta. Këto ditë të nxehta, presim me nga 1 orë linjën për në Mati 1. Autobusi Qendra 3A nuk vjen. Kisha apeluar tek Komuna e Prishtinës të marrë masa ndaj operatoreve, që nuk i respektojnë këto linja sepse po dëmtohemi ne qytetarët, sidomos në këto ditë të nxehta”, tha ai.
Radio Kosova, ka pyetur drejtuesit e linjës 3A, lidhur me vonesat e shkaktuar, por drejtori i kësaj linjë Fadil Gashi, e arsyeton vonesën me kolonat në qytet:
“Linja respektohet nën stop, por kolona është për të gjithë, jo vetëm për neve. Pikën e ka nga Vranjevci në Zllatar. Tani që e zë kolona, nuk do të thotë që nuk është nisur! Ai është nisur në kohë. Kolona është për krejt jo vetëm për neve”, tha Gashi.
Në përpjekje për të marrë një përgjigje për këto linja, Radio Kosova ka kontaktuar Trafikun Urban, por ata thanë se kjo çështje nuk bie nën përgjegjësinë e tyre:
“Këta autobus janë në kuadër të Komunës së Prishtinës, dhe ne nuk mund ta monitorojmë orarin tyre, sepse kjo nuk është ende në kompetencën tonë. Komuna është përgjegjëse për ta”, tha ai.
Ndërsa, nga Komuna e Prishtinës Drejtoria e Mobilitetit, në një përgjigje me shkrim i ka thënë Radio Kosovës se linjat në fjalë nuk janë linja të reja por janë linja ekzistuese dhe se vonesat janë si pasojë e trafikut të ngarkuar në komunikacion:
“Si pasojë e numrit të madh të pjesëmarrësve në komunikacion gjatë orëve kulmore dhe në orët e pasdites, janë shkaktuar vonesa në ofrimin e shërbimit të transportit në këtë linjë, si dhe në linjat tjera. Komuna e Prishtinës ka nënshkruar kontrata me operatorë privatë për ofrimin e shërbimit të transportit publik, dhe këta operatorë ndodhen në fazën e tranzicionit për kompletimin e flotës sipas standardeve evropiane (Euro 6)”, thuhet ne përgjigjen e Drejtorisë së Mobilitetit.
Nga kjo drejtori bëjnë me dijë se procesi i tranzicionit për linjat ekzistuese do të përfundojë deri më 31.12.2025, dhe pritet të ndikojë drejtpërdrejt në përmirësimin e cilësisë së shërbimit të transportit.
