Nga Rasim Smajlaj
Në një aktgjykim që bie si rrufe mbi skenën politike, Gjykata Kushtetuese e ka shpallur të pavlefshme aventurën e LVV-së për ta zgjedhur Kryetarin e Kuvendit me votim të fshehtë. Ky vendim është një shuplakë e rëndë për pushtetin, i cili u përpoq ta fuste demokracinë në kuti të mbyllura e të errëta. Gjykata ishte e prerë: Kryetari i Kuvendit nuk mund të zgjidhet kurrsesi me “fshehtësi votash”; Seancat e mbajtura pas 27 qershorit shpallen të pavlefshme; Grupi më i madh parlamentar ka të drejtë të propozojë kandidatin, por gjithçka duhet të ndodhë me votim transparent dhe brenda afatit kushtetues. Pra, aventura e LVV-së për të krijuar një “komision për votim të fshehtë” jo vetëm që ra poshtë, por u vulos si shkelje flagrante e Kushtetutës. Ky vendim e çjerr maskën e pushtetit që predikon transparencë, por në prapaskenë kërkonte ta fshehë votën nga qytetarët. Në vend që Kuvendi të ishte pasqyrë e vullnetit të popullit, LVV tentoi ta kthente në dhomë sekrete pazari. Sot, Gjykata i dha fund kësaj loje: Demokracia nuk fshihet pas perdeve. Kryetari i Kuvendit zgjidhet hapur, në sy të popullit.
