Kryeministri në detyrë, Albin Kurti, ka thënë se qeveria e tij dhe Lëvizja Vetëvendosje, si subjekti më i madh politik në vend, gjithmonë i kanë respektuar aktgjykimet e Gjykatës Kushtetuese, teksa ka shprehur shqetësimin për vonesën e publikimit të aktgjykimit të fundit të këtij institucioni në lidhje me seancën konstituive të Kuvendit të Kosovës.
Në një deklaratë për media të hënën, pasi mori pjesë në Seminarin Ndërkombëtar të Gjuhës, Letërsisë dhe Kulturës Shqiptare, Kurti tha se çdo vendim i Kushtetueses është respektuar gjatë qeverisjes së tij, por pyetja e përsëritur se a do ta respektojë këtë aktgjykim lë të kuptojë, sipas tij, se ai mund të jetë “pazakonshëm i padrejtë dhe i padurueshëm”.
“Nuk ka asnjë vendim të Gjykatës Kushtetuese të cilin qeveria e Republikës së Kosovës me mua si kryeministër nuk e ka respektuar. Dhe nuk ka asnjë vendim të Gjykatës Kushtetuese, që unë si kryetar i Lëvizjes Vetëvendosje nuk e kam respektuar. Por kur më pyesni sërish a do ta respektoj vendimin e Gjykatës Kushtetuese kjo më bën të mendoj se do të jetë pazakonshëm i padrejtë e i padurueshëm, saqë ndoshta duhet ta konsiderojmë se çfarë duhet të bëjmë”, tha Kurti.
Ai kujtoi se më 26 qershor Gjykata Kushtetuese kishte publikuar në të njëjtën ditë njoftimin dhe aktgjykimin e plotë, ndërsa më 8 gusht, është bërë vetëm njoftimi, derisa publikimi i aktgjykimit të plotë po vonohet.
“Edhe një herë po e ritheksoj se ne gjithmonë i kemi respektuar aktgjykimet e Gjykatës Kushtetuese, por kësaj radhe për dallim nga 26 qershori e kemi vetëm njoftimin e Gjykatës Kushtetuese, ndërsa aktgjykimi i plotë po vonohet. Kur ta lexojmë atë, do ta themi vlerësimin tonë meritor, por nuk është mirë që e kemi këtë vonesë. Në bazë të njoftimit, për bindjen time ka mospërputhje midis këtij aktgjykimi që ende po e presim në versionin e plotë dhe atij të 26 qershorit nga e njëjta përbërje e Gjykatës Kushtetuese”, u shpreh Kurti.
