Më 9 gusht 2025 rreth orës 07.00 të mëngjesit, kompania shtetërore “KAYO” sha ka ndërhyrë në mënyrë të paligjshme në ambientet e “News24” pa patur një vendim gjykate dhe pa na paralajmëruar ne gazetarët për të marrë pajisjet dhe sendet personale.
Pavarësisht marrëdhënieve kontraktuale midis kompanisë private dhe kompanisë shtetërore “KAYO” sha, ne si palë e tretë na janë cënuar të drejtat tona si gazetarë nga “KAYO” sha.
Ndërhyrja e paligjshme te vendi i punës dhe te pajisjet dhe sendet personale konfirmohet edhe nga vendimi i Gjykatës Administrative të Shkallës së Parë Tiranë të komunikuar në 12 gusht 2025 nga gjykatësja Alma Kodraliu.
Një ditë pas vendimit të Gjykatës, më 13 gusht 2025, i kemi bërë kërkesë Policisë së Shtetit, kompanisë publike “KAYO” sha dhe Zyrës së Përmbarimit Shtetëror për të filmuar pamjet nga brenda, me qëllim dokumentimin e hyrjes në zyrat tona, por ata e kanë refuzuar në mënyrë kategorike, madje edhe fotografimin e vendit.
Në 14 gusht 2025 kemi hyrë në godinë, ku kemi konstatuar se është hapur me forcë dera e redaksisë së investigimit “Vetting”, në kat të parë të godinës “Panorama Group”, dera e fundit në korridor majtas. Në këtë zyrë janë cënuar materialet tona dhe janë prekur pajisjet kompjuterike (PC), të cilat përbëjnë mjetet tona të punës dhe mbajnë informacione të ndjeshme që lidhen me profesionin tonë si gazetarë. Dera është tërhequr përsëri dhe është lënë e mbyllur, por marrja e mobiljeve, grumbullimi i dosjeve dhe pajisjeve kompjuterike në mes të zyrës provojnë ndërhyrjen e dhunshme të paligjshme.
E theksojmë se pajisjet kompjuterike dhe personale janë prekur në mënyrë të paligjshme, fakt që vërtetohet nga procesverbali zyrtar, të cilin ne, gazetarët, e kemi firmosur për shoqërinë përmbaruese shtetërore disa ditë pas vendimit të Gjykatës Administrative të Shkallës së Parë Tiranë, dhënë nga gjykatësja Alma Kodraliu.
Së pari, është shkelur neni 22 i Kushtetutës, i cili garanton lirinë e shprehjes dhe të shtypit dhe neni 23, që njeh të drejtën e çdo qytetari për t’u informuar. Ndërhyrja arbitrare në redaksinë e “Vetting” ka cenuar në mënyrë të drejtpërdrejtë ushtrimin e këtyre të drejtave kushtetuese.
Në vijim është shkelur neni 37, që garanton paprekshmërinë e jetës private dhe të korrespondencës, pasi pajisjet tona kompjuterike dhe personale janë prekur në mënyrë të paligjshme, duke rrezikuar informacionin e ndjeshëm gazetaresk.
Gjithashtu janë shkelur edhe detyrimet ndërkombëtare të Shqipërisë, neni 10 i Konventës Europiane për të Drejtat e Njeriut, që mbron lirinë e medias dhe neni 8 i saj, që mbron jetën private dhe korrespondencën. Këto u cënuan në momentin kur u prekën pajisjet tona të punës dhe informacioni i ndjeshëm që ato përmbajnë.
Redaksia e emisionit “ Vetting”
Me respekt, Ardian Bushi
