Më 14 shtator mërgata shqiptare, në mbështetje nga Organizata e Veteranëve të Luftës së Ushtrisë Çlirimtare të Kosovës, do të mbajë protestë në Hagë kundër Gjykatës Speciale në Hagë.
Lajmi është bërë i ditur nga ish-ushtari i Ushtrisë Çlirimtare të Kosovës, Uk Lushi, i cili ka theksuar se “më 14 shtator 2025, Haga do të dëgjojë buçimën e zërit të popullit të Kosovës nga çdo cep i botës”.
Lushi, në një postim në ‘Facebook’ ka shkruar se “gjykatës do t’i thuhet se nuk do të lejohet asgjë tjetër në emër të popullit, përpos drejtësisë dhe lirisë së Kosovës”.
Sipas tij, faktet, provat dhe argumentet, tregojnë që ata duhet të lirohen në emër të popullit të Kosovës dhe t’i kthehen popullit për ta vazhduar punën në përparimin dhe forcimin e Kosovës.
“Prandaj, populli i Kosovës, veteranët e UÇK-së dhe çdo njeri që e di drejtësinë e luftës, fatkeqësisht edhe ngase Kuvendi dhe institucionet e Kosovës nuk kanë kryer obligimet ta mbikëqyrin abuzimin legal të Prokurorisë dhe Gjykatës Speciale, kemi vendosur të vazhdojmë angazhimin qytetar duke protestuar dhe kërkuar nga Specialja lirimin sa më të shpejtë të formuesve të shtetit të Kosovës”, ka shkruar mes tjerash Lushi në ‘Facebook’.
