Gjashtë persona janë pranuar në Qendrën Klinike Universitare të Kosovës (QKUK) pas një aksidenti që ka ndodhur në Lupç të Podujevës.
Sipas drejtorit të Emergjencës në QKUK, Naser Syla, gjendja e tyre është stabile dhe jashtë rrezikut për jetë.
“Të gjithë të lënduarit janë liruar për në shtëpi”, tha Syla për RTK-në.
Lajmin për RTKlive e ka konfirmuar zëdhënësja e Policisë së Kosovës për rajonin e Prishtinës, Flora Ahmeti.
“Sot rreth orës 20:00 kemi pranuar informatën se në rrugën Prishtinë-Podujevë, ka ndodhur një aksident trafiku me lëndime. Në këtë aksident kanë qenë të përfshira dy automjete. Si pasojë e aksidentit janë lënduar pesë persona. Me rastin po merret njësiti i trafikut rajonal”, ka thënë Ahmeti.
