Partia Demokratike e Kosovës ka paralajmëruar se do të mbajë konferencë për media sot, para objektit të Gjykatës Kushtetuese.
Ndonëse në njoftimin e këtij subjekti politik nuk është bërë e ditur arsyeja e konferencës, ishte kreu i kësaj partie, Memli Krasniqi që para pak ditësh paralajmëroi se brenda kësaj jave do ta dërgojnë në Gjykatën Kushtetuese vendimin e Zyrës së Rregullatorit për Energji (ZRRE), për daljen e 1,300 bizneseve në treg të lirë të energjisë.
Konferenca është paraparë të fillojë në orën 15:00.
“Në konsultim me avokatin Faton Fetahu dhe ekipin e juristëve të PDK-së, kemi konstatuar se tashmë janë përmbushur të gjitha kushtet ligjore që ky vendim i ZRRE-së të ankimohet në Gjykatën Kushtetuese, gjë që do ta bëjmë gjatë kësaj jave”, kishte shkruar Krasniqi në një postim në rrjete sociale.
Ai kishte thënë se do të kërkojnë masë të përkohshme, në mënyrë që, sipas tij, ky vendim i dëmshëm të mos zbatohet deri në shqyrtimin përfundimtar të çështjes.
“Ky nuk është vetëm një proces gjyqësor. Është një betejë për të mbrojtur bizneset tona, ekonominë e vendit, punëtorët tanë dhe familjet e tyre nga një abuzim i pashembullt i pushtetit, i cili i ka detyruar qytetarët dhe ndërmarrjet të blejnë energji me çmime 280% më të larta – vetëm për të mbushur xhepat e kompanive të licencuara nga qeveria”, ka shtuar Krasniqi.
