Autoritetet serbe kanë aftësinë për të kontrolluar situatën me trazirat që shpërthyen në Beograd natën e 19 gushtit, falë mbështetjes së forcave të sigurisë dhe lëvizjeve vendimtare të Presidentit Aleksandar Vuçiç, tha Viktor Vodolacki, anëtar i Dumës ruse dhe nënkryetar i komitetit për integrimin euroaziatik dhe marrëdhëniet me bashkatdhetarët.
Vodolacki është anëtar i partisë në pushtet në Rusi, Rusia e Bashkuar, dhe një mbështetës i flaktë i Presidentit rus Vladimir Putin. Në deklaratat e tij, ai shpesh mbështet forcimin e marrëdhënieve me Serbinë dhe ish-anëtarët e Bashkimit Sovjetik.
Protesta antiqeveritare u mbajtën në të gjithë Serbinë të hënën në mbrëmje dhe media botërore raportoi se Vuçiç kishte nxjerrë në rrugë huliganë dhe roje private sigurie , duke i vënë ata kundër protestuesve.
Megjithatë, mediat ruse shkruajnë se natën e 19 gushtit, “më shumë se dy mijë protestues u mblodhën në Beograd, të cilët jo vetëm sulmuan policinë, por edhe shkatërruan pronën, duke djegur kontejnerë plehrash dhe duke shembur zyrën e Partisë Progresive Serbe”. Vuçiç i përshkroi këto ngjarje si një përpjekje për të kryer një revolucion me ngjyra, të organizuar dhe të financuar nga jashtë.
Sipas mendimit të përfaqësuesit rus, autoritetet serbe duhet të kishin treguar një reagim më të rreptë ndaj formave të para të dhunës që në vjeshtën e vitit 2024, gjë që mund të kishte parandaluar përshkallëzimin e mëtejshëm të situatës.
“Duke pasur parasysh që ushtria dhe policia janë në anën e Vuçiçit, rendi do të rivendoset në Serbi. Dhe herën tjetër, ata nuk do të bien pre e atyre ‘biskotave’ që ofrojnë Bashkimi Evropian ose anglo-saksonët”, tha Vodolacki, raporton TASS.
