Kryetari i Gjilanit, Alban Hyseni, ka nderuar komandantin e dalluar të Ushtrisë Çlirimtare të Kosovës, Fatmir Mehmeti, me titullin e lartë “Nderi i Qytetit”, në shenjë respekti dhe mirënjohjeje për kontributin e tij të jashtëzakonshëm në çështjen kombëtare dhe luftën për liri.
Në ceremoninë e organizuar për këtë rast, përveç kryetarit Hyseni, morën pjesë edhe ministri në detyrë i Mbrojtjes, Ejup Maqedonci, deputetja Arijeta Rexhepi, bashkëpunëtorë institucionalë dhe përfaqësues të Organizatës së Veteranëve të Luftës.
Duke e cilësuar Fatmir Mehmetin si simbol të përkushtimit dhe dashurisë për atdheun, Hyseni tha se ai përfaqëson idealin më të lartë të sakrificës kombëtare.
Ai rikujtoi se gjatë periudhës së luftës, Fatmir Mehmeti ishte kthyer nga Gjermania për t’iu bashkuar radhëve të UÇK-së, duke dhënë një shembull të rrallë të devotshmërisë ndaj vendit.
Në këtë rrugë të shenjtë, sipas tij, ishte bashkuar edhe vajza e tij, Shqipe Mehmeti – Selimi, sot deputete dhe bashkëpunëtore e tij në Kuvend.
“Për kontributin e jashtëzakonshëm dhe figurën e tij të ndritur, e nderuam komandantin Mehmeti me titullin ‘Nderi i Qytetit’, si shenjë respekti dhe mirënjohjeje të përjetshme” ka theksuar Hyseni.
Maqedonci, tha se respektimi i luftëtarëve të lirisë dhe veprimtarëve të çështjes kombëtare është një vlerësim i merituar për të kaluarën e lavdishme të popullit shqiptar dhe një frymëzim i fuqishëm për brezat e ardhshëm.
