Gjatë muajit korrik 2025, mbi 1,82 milionë shtetas të huaj kanë hyrë në Shqipëri me një rritje me 0,4%, duke treguar vijimësinë e interesit për Shqipërinë si destinacion turistik.
Instituti i Statistikave (INSTAT) publikoi sot raportin mbi lëvizjet e shtetasve, ku evidenton se, në Korrik 2025, 95% e hyrjeve të shtetasve të huaj janë nga kontinenti Evropian.
INSTAT raporton se në 99% të rasteve, hyrjet e shtetasve të huaj kanë qenë për pushime dhe turizëm, me një rritje prej 0,2% krahasuar me Korrik 2024. Ndërkohë, hyrjet për qëllime biznesi dhe profesionale kanë shënuar një rritje domethënëse prej 15,6%, duke reflektuar rritjen e interesit për Shqipërinë edhe në aspektin ekonomik.
Ky trend konfirmon potencialin në rritje të Shqipërisë si një vend me rëndësi në hartën turistike dhe ekonomike të rajonit. Autoritetet po theksojnë rëndësinë e menaxhimit të qëndrueshëm të kësaj rritjeje për të garantuar një përvojë pozitive për vizitorët dhe përfitime afatgjata për vendin.
Sipas INSTAT, gjatë muajit Korrik 2025, në territorin e Republikës së Shqipërisë janë regjistruar 2.663.010 hyrje të shtetasve shqiptarë dhe të huaj, duke shënuar një rritje prej 1,5% krahasuar me të njëjtën periudhë të vitit 2024.
Daljet nga territori rezultojnë të kenë qenë 2.576.342, me një rritje më të lartë prej 9,6% krahasuar me Korrik 2024, duke reflektuar një dinamikë të shtuar të qarkullimit ndërkombëtar.
INSTAT raporton se, 782.849 shtetas shqiptarë kanë dalë nga territori shqiptar (rritje me 11,1%), dhe 1.793.493 shtetas të huaj kanë dalë nga vendi (rritje me 9,0%).
