Në Tiranë u promovua libri “Dr. Ibrahim Rugova – Arkitekt i Pavarësisë së Kosovës”, me bashkautorë Besa Tafilaj-Pinchoti dhe Korab Kastrati.
Para të pranishmëve, dy bashkautorët shpalosën idenë dhe procesin e përgatitjes së librit kushtuar Dr. Rugovës, duke diskutuar mbi reflektimet dhe angazhimet e tij në mjedise të ndryshme për kauzën e pavarësisë së Kosovës.
Me këtë rast, mbajtën fjalë përshëndetëse Dr. Sali Berisha, ish-eurodeputetja Doris Pack, si dhe personalitete të tjera që kishin kontribuar në forma të ndryshme në rrugëtimin e Ibrahim Rugovës.
“Rugova arriti të krijojë një unitetit që Kosova kurrë nuk e ka pasur. Dhe ky ishte një unitet në projektin e tij, në projektin e pavarësisë së Kosovës, Kosovës së lirë dhe të pavarur. Rugova, në këtë projekt, kaloi nga një kancelari në një tjetër, nga një institucion në një tjetër, por me civilitetin dhe gandizmin e tij, ai do vlerësohej nga Parlamenti Europian me çmimin e madh të Saharov. Kjo ishte një mbështetje e jashtëzakonshme për popullin e Kosovës dhe personalitetin e Ibrahim Rugovës”, theksoi Berisha.
Libri është përgatitur nga personalitete të diasporës, me mbështetjen e “Jalifat Publishing” të filantropit Ramiz Tafilaj nga ShBA.
