Reshjet e shiut të ditës së sotme kanë shkaktuar vështirësi në rrugën “Hilmi Rakovica” në lagjen Bregu i Diellit, ku ujërat kanë mbuluar një pjesë të rrugës dhe kanë hyrë drejt oborreve të disa shtëpive.
Banorët e kësaj zone thonë se problematika ka nisur disa vite më parë, pas asfaltimit të rrugës nga Komuna e Prishtinës, kur sipas tyre niveli i asfaltit është ngritur mbi trotuare dhe pusetat ekzistuese janë mbuluar. Sipas banorëve vetëm një ujëmbledhës është hapur pas intervenimit të tyre.
Banorët e kësaj pjese kanë thënë se për këtë situatë janë ankuar në komunë.
Nga ana tjetër, Drejtoria e Investimeve Kapitale e Komunës së Prishtinës, në një përgjigje me shkrim për RTKlive, ka thënë se nuk ka qenë e njoftuar me këtë problem, porse do të intervenojë për ta sanuar problemin.
“Deri më tani Komuna nuk ka qenë e njoftuar për këtë problematikë. Megjithatë, do të kërkohet nga operatori përgjegjës që të kryejë pastrimin e të gjitha pusetave, pasi kjo paraqet obligim të tij kontraktual”, thuhet në përgjigjen e Komunës.
