Në Gjakovë, pasionantët e leximit kujdesshëm i ruajnë bibliotekat e tyre me mijëra tituj.
Pjetër Geci nga Gjakova, profesor i gjuhës dhe letërsisë shqipe, tashmë në pension, është ndër lexuesit e devotshëm të librit i cili edhe sot e kësaj dite nuk ndalet së shfletuari libra dhe literaturë, sidomos asaj letrare.
Në bibliotekën e tij personale janë të renditur me shumë kujdes mbi 3,870 tituj, kryesisht të nivelit letrar, historik, shkencor dhe psikologjik.
Profesori thotë se gjatë gjithë jetës librin e ka pasur mikun më të mirë, por shpreh shqetësimin se kohëve të fundit po lexohet gjithnjë e më pak.
“Në sirtarët e bibliotekës sime janë 3,870 tituj. Unë gjatë tërë jetës sime librin e kam pasur dëshirë, motiv, ai më ka inkuaruar dhe impresionuar. Mendoj se leximi e fisnikëron shpirtin e njeriut, e fisnikëron jetën e njeriut. Edhe gjatë leximit unë ndjej një kënaqësi të veçantë kur i lexoj shkrimtarët botërorë, por në veçanti kur e lexoj të madhin Ismail Kadare i cili ka mbërritur përtej gjeografisë shqiptare dhe evropiane, ka arritur që t’i pushtojë letrat me dimensione botërore”, tha Pjetër Geci.
Ndërkaq, Arbër Malota, një tjetër studiues i letërsisë, thotë se të pasurit e një biblioteke, sidomos për njerëz të profesionit, edhe në të kaluarën ka qenë shumë normale. Thotë se është rritur duke pasur bibliotekë në familje.
“Të pasurit e një biblioteke prezanton kulturë së pari, qytetari, prezanton njohuri, dituri, dashuri për dijen, për librin. Prandaj ky paradoks, le të themi, është ironi e fatit sepse sot, me të gjitha këto kushte që kemi në krahasim me të kaluarën, njerëzit nuk krijojnë biblioteka personale dhe ky trend duhet të ndalet trendi i mospasjes së bibliotekave dhe është mirë që të zhvillohet si kulturë e shoqërisë sonë kosovare, që minimumi secili në shtëpinë e tij ta ketë një bibliotekë personale që do t’u shërbejë brezave të ndryshëm”. tha ai.
Në Gjakovë, për lexuesit e këtij lokaliteti është Biblioteka Komunale, e cila ka në dispozicion një fond të madh dhe shumë të larmishëm për nxënës, studentë dhe studiues të të gjitha profileve.
