Edhe pse janë në kontest gjyqësor me Zyrën e Rregullatorit për Energji, shumë bizneseve të mëdha u është ndalur rryma nga KEDS-i. Kjo pasi ato nuk kanë lidhur kontrata për furnizim me daljen në treg të lirë. Nga Dhoma e Tregtisë dhe Industrisë kanë ngritur shqetësime, pasi thonë se disa prej këtyre bizneseve mund t’i fitojnë paditë ndaj ZRRE-së. E nga kjo e fundit kanë premtuar se do t’i kompensojnë nëse ndodh një gjë e tillë.
175 padi dhe masa janë dorëzuar në Gjykatën Komerciale nga ana e bizneseve kundër vendimit të Zyrës së Rregullatorit të Energjisë për daljen në treg të lirë.
Nga Komercialja kanë thënë se deri më 19 gusht kanë dalë me vendime për 9 prej padive.
Pavarësisht se shumica e bizneseve vazhdojnë të jenë në kontest gjyqësor me ZRRE-në, kjo e fundit i la pa rrymë, pasi ato nuk kanë lidhur kontrata për furnizim.
“Kush ia mbulon humbjen dhe dëmet që i pëson biznesi… nëse vonohen lëndët. Prandaj kemi kërkuar shtyrje”, tha Kushtrim Ahmeti, nga Dhoma e Tregtisë dhe Industrisë.
Nga Zyra e Rregullatorit të Energjisë i kanë thënë RTK-së se në rast se gjykata do të vendosë pro këtyre bizneseve, atëherë do t’i kyçin në rrjet të energjisë elektrike dhe do t’i kompensojnë.
Njohës të drejtësisë thonë se situata e krijuar është problematike, sidomos me marrjen e veprimeve të tilla kur palët janë në kontest gjyqësor.
Mbi 400 biznese janë shkyçur nga rrjeti i energjisë elektrike për shkak se nuk kanë lidhur kontrata për furnizim me daljen në treg të lirë të energjisë.
Bizneset janë ankuar se lidhja e kontratave në këtë situatë do t’ua rriste shpenzimet për energji elektrike për mbi 100%.
