Në mungesë të ndriçimit publik, rrugët e Prishtinës natën mbesin të pasigurta. Qytetarët thonë se kjo situatë ua vështirëson jetën e përditshme dhe se pasojat ndihen sidomos nga fëmijët dhe gratë. Nga Komuna e Prishtinës premtojnë zgjidhje të shpejtë.
Errësira është shndërruar në përditshmëri për disa lagje të kryeqytetit. Pa drita publike, lëvizja nëpër rrugë bëhet e pasigurt dhe shpesh burim aksidentesh. Në njërën prej rrugëve të lagjes Ulpiana, një i ri është rrëzuar pikërisht për shkak të mungesës së ndriçimit.
Pa ndriçim publik prej kohësh kanë mbetur edhe rruga “Xhemajl Prishtina”, si dhe rruga “Abedin Rexha”, pranë Hanit të Dilit.
“Që dy vjet s’ka këtu ndriçim. Fëmijët janë të rrezikuar shumë. Gratë për me udhëtu janë shumë të rrezikuara, sidomos në mbrëmje. Kur ka me dal shoqja diku, më thërret në telefon, thotë: hajde merrem, se nuk guxon me ardh këtu sepse janë të rrezikuara prej qenëve. Prishtinë është kjo, dhe është kryeqytet”, tha qytetari Jakup Bekteshi.
Për Florim Hasanin kjo situatë është e vështirë.
“Ka fëmijë dhe ka të moshuar, jo vetëm për neve, por edhe për udhëtarët që lidhen me rrugë të tjera që kalojnë këndej pari. Për shembull, femrat e presin dikë 1-2 orë për me kalu këtu, se tuten mos po i han ndonjë qen, apo po i sulmon dikush. Është shumë problem i madh,” theksoi ai.
Nga Komuna e Prishtinës thonë se ndriçimi publik është prioritet dhe se brenda pak javësh do të ketë investime të reja në disa lagje të kryeqytetit.
“Ne kemi filluar dhe jemi duke punuar në Prishtinë në 120 rrugë për zgjerimin e rrjetit të ndriçimit publik me smart LED, që do të thotë se ulin edhe shpenzimin e energjisë elektrike. Te RTK-ja për 3-4 ditë do të fillohet me punu. Po besoj se diku rreth 8 mijë poqa shumë shpejt, për 3-4 javë, kanë me u vendos nëpër Prishtinë si ndriçim publik. Ne kemi filluar tash edhe nëpër parqet në Prishtinë, të cilat nuk janë në gjendje të mirë me ndriçim publik – në Tokëbafqe, në Gërmi edhe në Parkun e Qytetit – që do të thotë se për 10 ditë do t’i përmbyllim edhe parqet me ndriçim publik,” tha Bekim Gashi, drejtor i Shërbimeve Publike në Komunën e Prishtinës.
Ai thotë se projekte të ngjashme janë në zhvillim edhe në lagjet “Arbëria”, “Taslixhe”, “Sofali” dhe disa zona rurale.
