Fshati Vuthaj, një vendbanim historik shqiptar në Krahinën e Plavës dhe Gucisë, po rikthehet në qendër të vëmendjes turistike. Pas një periudhe kur dukej se po braktisej, ky lokalitet i lashtë ka rifituar gjallërinë e dikurshme, duke tërhequr mijëra vizitorë nga vendi dhe e gjithë bota. Bukuritë natyrore të rralla dhe mikpritja tradicionale e banorëve të tij e bëjnë Vuthajn një destinacion të veçantë për turistët.
“Tash kemi një gjallëri të tillë, sidomos gjatë sezonit veror ku ka turizëm të shtuar dhe mbulohet nga qindra e nga mijëra veta. Dhe jo vetëm në zonat e banuara po gjitha këto bjeshkë rreth e rrotull, gjitha këto shtigje malore janë të mbushura me grupe, me individë me grupe të vogla, me kolona të njerëzve që ecin, që lëvizin, takojnë njëri-tjetrin, përshëndesin njëri-tjetrin dhe kjo na jep shumë shpresë për një të ardhme. Me pak investime, me pak përmirësim të kushteve të infrastrukturës e të kapaciteteve ky vend do të zhvillohet dhe ka mundësi që të kthehet shumë jetë në këtë vend”, tha Enver Ulaj, banor në Vuthaj.
Por kushti elementar për të ndodhë kjo është përmirrësimi infrastrukturës rrugore në radhë të parë, sepse këtu rrugët janë të ngushta dhe të shkatërruara tërësisht.
“Jo vetëm që janë të ngushta por janë edhe me gropa, janë edhe me kthesa të papritura dhe ka vite që nuk po mirëmbahen. Fatkeqësisht siç po e shihni gjendja e rrugëve është e tillë dhe ka vite që nuk është përmirësuar edhe pse trafiku ka ndryshuar shumë viteve të fundit. Ka një fluks kaq të madhe të turistëve që vijnë nga vende të ndryshme dhe rrugët janë të tilla, të shkatërruara që ka dekada që janë në gjendje të tillë fatkeqësisht. Kjo po ndikon jashtëzakonisht te njerëzit që jetojnë këtu. Pushtetet lokale këtu edhe nuk kanë kapacitet por edhe projektet zgjasin me vite”, shtoi Ulaj.
E në vend të dorës së munguar të shtetit atje, banorët po kërkojnë angazhim më të madh të diasporës për të investuar në vendin e të parëve të tyre, në mënyrë që të ruhet vazhdimësia e jetës këtu.
“Ata që kanë krijuar mjete financiare përjashta t’i bashkojnë ato mjete dhe të ndërtojnë këtu. Këtu ka mundësi të ndërtohet një qendër e mrekullueshme skijimi, ka terene të jashtëzakonshme për të ndërtuar ndonjë resor turistik. E kanë obligim ndaj gjysh e stërgjyshërve që të investojnë bashkarisht dhe ta shfrytëzojnë potencialin që e ka kjo pjesë dhe të mbetet kjo popullata këtu”, tha Binak Ulaj, po ashtu banor në Vuthaj.
“Në këtë vend ku jemi ne, një restaurant apo një shitore kishte me pas punë më shumë se tri shitore në Guci sepse turizmi malor këtu është shumë në zhvillim e sipër. Edhe llogaritet si qendra kryesore fshati Vuthaj sa i përket turizmit malor”, tha Shaqë Dedushaj, mergimtar.
Fshati Vuthaj shtrihet në lartësi mbitedetare mbi 1000 m, dhe është i rrethuar me bjeshkë deri në 2500 metra lartësi mbidetare.
