Një notar 29-vjeçar rus u zhduk dje gjatë notit tradicional vjetor nëpër Ngushticën e Bosforit, njoftoi Komiteti Olimpik Turk, organizator i Garës Ndërkontinentale të Notit në Bosfor.
Notari rus Nikolai Svechnikov garoi në edicionin e 37-të të garës së njohur prej 6.5 kilometrash, e cila është sfiduese për shkak të rrymave të forta që rrjedhin nëpër ngushticën midis Azisë dhe Evropës. Morën pjesë më shumë se 2,800 notarë nga 81 vende.
“Po punojmë ngushtë me rojen bregdetare dhe policinë për të hetuar këtë incident”, tha Komiteti Olimpik Turk (TMOK) në një deklaratë. “Gara përfundon dy orë pasi notari i fundit hyn në ujë. Në fund, e gjithë pista u kontrollua dhe u përcaktua se nuk kishte më notarë në ujë.”
Trafiku i anijeve dhe mallrave u pezullua gjatë garës. Bosfori lidh Detin e Zi me Detin e Marmarasë dhe, nëpërmjet Dardaneleve, me Detet Egje dhe Mesdhe.
