“Golin, fitoren dhe çmimin ‘Ylli i Javës’ ia dedikoj babit tim të ndjerë”. Kështu u shpreh sulmuesi i KF Dukagjinit, Mërgim Pefqeli, pasi u shpall lojtari më i mirë i javës së dytë në Superligën e Kosovës në futboll.
Në fakt, Federata e Futbollit të Kosovës, të hënën ndau çmimin e më të mirit të javës së dytë, i cili i takoi sulmuesit të Dukagjinit sipas vlerësimit nga Komisioni i Veteranëve të Futbollit, në përbërje: Vllaznim Visoka, Xhavit Mehmeti dhe Enver Prapashtica. Pefqeli shënoi golin e parë në fitoren që skuadra e tij e arriti kundër Gjilanit (2:0).
“Gjithçka që kemi punuar gjatë javës ishte shumë efektive në ndeshje dhe kjo ka qenë pika kryesore në fitoren ndaj Gjilanit”, shtoi ai, duke falënderuar bashkëlojtarët dhe stafin teknik.
Sulmuesi theksoi edhe ndikimin e përforcimeve të reja në skuadër, si Merisin dhe Zulfiu. “Besoj që këto transfere na bëjnë ekip shumë më të fortë. Meqenëse na pret një kampionat i gjatë dhe i rëndë, duhet të kemi më shumë lojtarë dhe të jemi kompaktë”, tha Pefqeli për faqen zyrtare të FFK-së.
