Deputeti i AAK-së Daut Haradinaj, i cili i ka dhënë votë Dimal Bashës për t’u bërë kryetar i Kuvendit tha se sfidë e radhës do të jetë zgjedhja e nënkryetarëve të Kuvendit.
Ai tha se Bashën për kryetar të Kuvendit e votoi pasi e pa se Vetëvendose e pati seriozisht se ai ishte kandidati i preferuar i Lëvizjes Vetëvendosje.
“Ne kemi pasur një votim të lirë si grup. Unë personalisht ia kam dhënë votën. I kam pyetur a e kanë seriozisht që ky është kandidati i preferuar për kryetar të Kuvendit, më thanë po dhe kështu vepruam, votuam për. Ky është realiteti i Kosovës deri në pafundësi nuk mund të lëmë kështu. Mendoj që ky moment të jetë hapi i parë, por të shohim tash si do të jetë sfida e radhës, zgjedhja e nënkryetarëve. Edhe aty e shoh një problem që nuk do të kalojë shumë lehtë edhe kur dihet se nënkryetarët do të votohen ndaras, njëherë do të jenë nënkryetarët e partive parlamentare shqiptare e pastaj të komunitetit serb, e nuk e dimë si do të jetë situata rreth numrit të votave”, tha Haradinaj.
