Deputetja e LDK-së, Doarsa Kica Xhelili ka ripotencuar qëndrimin e këtij subjekti politik se nuk do të votojnë asnjë kandidat nga Lëvizja Vetëvendosje për karrigen e kryetarit të Kuvendit të Kosovës.
“Nuk kemi asnjë votë për asnjë kandidat sepse për ne tema e propozimeve është e kryer. Sa i përket kandidatëve që mund të votohen nga partitë e tjera, nga ajo që pamë pardje mua m’u duk taktizim, jo sepse u propozua si emër Basha, sepse fundja mund të thonë se ai i përfaqëson ata denjësisht, por për faktin që u refuzua një konsultim”, tha ajo pak para vazhdimit të seancës konstituive për herë të 58-të.
“Mua më vjen keq që Kuvendi ka rrëshqitur në pikën ku ne flasim kush ka muskuj më të mëdhenj taktizues e strategjik, për t’u dukur më i fortë në kuptimin e lojërave, e jo në kuptim të konstituimit të Kuvendit”, ka thënë ajo.
Kica Xhelili po ashtu ka sqaruar se arsyeja e mungesës së saj disa herë në vazhdimet e seancave konstituive ndërlidhet me gjendjen e saj shëndetësore.
