Kryetari i PDK-së, Memli Krasniqi, para vazhdimit të seancës për konstituimin e Kuvendit tha se kanë deponuar kërkesë te kryesuesi i Kuvendit, Avni Dehari, që pas një propozimi të Lëvizjes Vetëvendosje për kryetar Kuvendi të kenë një konsultë 10-minutëshe me të gjitha partitë parlamentare.
Krasniqi tha se ky ishte qëllimi edhe para dy ditësh, kur kishin bërë një kërkesë të tillë, por që ajo u refuzua nga Dehari.
“Njëjtë sikur në vazhdimin e seancës pardje, kur para votimit për kryetar të Kuvendit kërkuam një konsultë 10-minutëshe mes grupeve parlamentare, një gjë të tillë e kemi bërë edhe sot tashmë zyrtarisht duke i adresuar një kërkesë kryesuesit Dehari. Kërkesa jonë edhe sot është që të takohemi me grupet tjera parlamentare, pra nuk kemi nevojë për konsultë mes nesh, sepse qëndrimi ynë është i qartë, por arsye e kërkesës është që të sigurohemi që LVV-ja vërtetë dëshiron të japë një kandidat më të denjë, më të përgatitur dhe së paku më të duhur se kandidati që propozuan për kryetar të Kuvendit. Mënyra si e kanë propozuar atë kandidaturë, në mënyrë të befasishme dhe tendencioze, nuk ishte një mënyrë e vërtetë për zgjedhje, por më shumë taktizim për të testuar pozicionin tonë. Unë e përsëris, ne i qëndrojmë besnik qëndrimit tonë që votojmë një kandidat që nuk ka qenë pjesë e ekzekutivit, por kërkesa për konsultë, si atë ditë edhe sot, është për t’i thënë LVV-së: A jeni të sigurt që dëshironi të degradojnë nivelin e përfaqësimit të Kuvendit të Kosovës, i cili për ne nuk është i duhuri dhe nuk i plotëson kriteret bazike për të qenë kryetar i Kuvendit, institucionit më të lartë përfaqësues në Kosovë?”, theksoi Krasniqi.
Por kreu i PDK-së tha se nëse LVV-ja vërtetë e konsideron që Dimal Basha është kandidati më i mirë për këtë pozicion, ata do të votojnë.
“Jam i bindur që edhe ata dhe çdo qytetarë e di se një kandidat i tillë nuk është për të udhëhequr Kuvendin e Kosovës. Kam dashur t’u tregoj që nëse keni dëshirë, ne do ta votojmë, por qiteni një njeri tjetër, të paktën mos ta degradojmë Kuvendin. Por, nëse vendosni ta kandidoni dikënd të tillë, ne nuk ua mohojmë këtë të drejtë, sepse këtë privilegj e keni sipas Kushtetutës. Por duhej të ishit më të përgjegjshëm karshi qytetarëve dhe institucioneve”, tha Krasniqi.
