Presidenti amerikan ka shkarkuar nga detyrat guvernatoren e Rezervës Federale, Lisa Cook, në një mënyrë të paprecedentë në historinë 111-vjeçare të Rezervës Federale .
Donald Trump i ” dorëzoi ” Cook një letër nëpërmjet mediave sociale duke e njoftuar për shkarkimin e saj, një veprim që shënon një përshkallëzim të ndjeshëm në marrëdhënien e Trump me Rezervën Federale – të cilën ai e akuzon për pengimin e uljes së normave të interesit.
Cook, e emëruar në bordin e Rezervës Federale nga ish-Presidenti Joe Biden në vitin 2022 dhe guvernatorja e parë femër me ngjyrë e Rezervës Federale, është kritikuar së fundmi nga Trump dhe anëtarët e administratës së tij për mashtrim të dyshuar me kreditë hipotekare. Akuzat, të ngritura për herë të parë nga Drejtori i Agjencisë Federale të Financimit të Strehimit, Bill Pult, pritet të hetohen nga Departamenti i Drejtësisë i SHBA-së.
Letra
” Kam përcaktuar se ka baza të mjaftueshme për t’ju shkarkuar nga pozicioni juaj “, tha Trump, ndër të tjera, në letrën e tij drejtuar Cook.
” Duke pasur parasysh sjelljen tuaj mashtruese dhe ndoshta kriminale në çështjet financiare… nuk kam besim të tillë në integritetin tuaj. Të paktën, kjo sjellje tregon neglizhencë serioze në marrëdhëniet financiare, gjë që vë në pikëpyetje kompetencën dhe besueshmërinë tuaj si rregullator financiar “, shtoi Trump në letrën e tij.
Çfarë thotë Cook?
Cook pohon se nuk është akuzuar për asgjë kriminale.
” Presidenti Trump pretendoi se më shkarkoi ‘për shkak ‘ , kur nuk ka shkak sipas ligjit dhe ai nuk ka autoritet për ta bërë këtë “, tha Cook përmes avokatëve të saj. ” Unë nuk po jap dorëheqjen. Do të vazhdoj të kryej detyrat e mia për të ndihmuar ekonominë amerikane, siç kam bërë që nga viti 2022. “
Mbetet e paqartë nëse Trump ka autoritetin ligjor për të shkarkuar Cook për akuzat specifike . Sipas ligjit amerikan, një president mund të shkarkojë anëtarët e bordit të Rezervës Federale vetëm “ për shkak të arsyeshëm ” – megjithëse ajo që përbën shkak për shkarkim nuk është përcaktuar qartë.
Edhe pse përjashtimi mund të çohet në gjykatat amerikane, madje deri në Gjykatën Supreme, ky zhvillim e vendos bankën qendrore të ekonomisë më të madhe në botë në ujëra të panjohura.
