Kryetari i ri i Kuvendit të Kosovës, Dimal Basha, i ka quajtur të rreme raportimet se ai si bashkautor i shkrimit në “OpenEdition Journals” bashkë me Jana Arsovskan, ka shkruar kundër UÇK-së. Ai ka thënë se nuk është hera e parë që sulmohet, siç thotë, me të pavërteta.
Basha thotë se në këtë shkrim është autor vetëm i Kapitullit 3, i cili thotë se trajton depërtimin e Islamit fundamentalist në Evropën Juglindore, me fokus Kosovën dhe aty përfundon përgjegjësia e tij.
“Nuk është hera e parë që sulmohem me të pavërteta nga qarqe të caktuara, mirëpo para gjithë qytetarëve kam përgjegjësinë dhe obligimin t’ju jap llogari dhe sqarim për akuzat e ngritura sot. Punimi që po qarkullon në media është i vitit 2012, në kohën kur unë kam qenë student. Autorësia ime në këtë artikull i përket vetëm Kapitullit 3, i cili trajton depërtimin e Islamit fundamentalist në Evropën Juglindore, me fokus Kosovën. Këtu përfundon përgjegjësia ime lidhur me punimin në fjalë. Në lidhje me këtë çështje, tashmë është sqaruar për media edhe vet autorja Jana Arsovska, e cila ka dërguar një email demantues, dhe e ka bërë të qartë që unë kam dorëzuar për publikim vetëm Kapitullin 3 dhe mbaj përgjegjësi vetëm për përmbajtjen në atë kapitull”, shkroi Basha në reagimin e tij.
Kryetari i Kuvendit i zgjedhur një ditë më parë, thotë se e çmon lart luftën e UÇK-së dhe kurrë nuk do të gjendet e thënë apo e shkruar nga ai asnjë përmbajtje që bie ndesh me këtë vlerë të shenjtë.
“Unë, Dimal Basha, e çmoj lart luftën e Ushtrisë Çlirimtare të Kosovës dhe sakrificën e popullit tonë për liri. Nga goja ime dhe nga duart e mia nuk është shkruar dhe nuk do të mund të gjendet asnjë përmbajtje që bie ndesh me këtë vlerë të shenjtë të popullit tonë. I kërkoj falje qytetarëve që janë shqetësuar nga ky raportim i rremë, dhe prandaj lus mediat që të raportojnë drejtë dhe saktë, e në veçanti për tema kaq të ndjeshme, që nuk lidhen vetëm me mua personalisht, por me tërë popullin e Republikës së Kosovës”, ka shkruar kryetari i Kuvendit, Dimal Basha në reagimin e tij.
Ndryshe, në shkrimin e publikuar në “OpenEdition Journals” në vitin 2012 me autorë Jana Arsovska e Dimal Basha, thuhet mes tjerash se “UÇK-ja nuk u mbështet formalisht nga ndonjë shtet, kështu që duhej të mbështetej në burime të tjera alternative financimi dhe se “fondet për UÇK-në vinin nga shqiptarë të zakonshëm në diasporë si dhe nga trafikantë droge që vepronin në të gjithë Evropën Perëndimore dhe SHBA-në”.
Autorja, Jana Arsovska, ka thënë se Bashës i përket vetëm një pjesë e studimit të saj, ku flet për përhapjen e islamit fundamentalist. Ajo në reagimin e saj ka theksuar se pretendimet që po qarkullojnë në disa media, janë keqinterpretime.
