Sot i është dhënë lamtumira e fundit veprimtarit dhe atdhetarit të lirisë, Ilmi Ramadani.
Gjatë ditës, deputetë të Kuvendit të Kosovës, përfaqësues nga organizatat e dala nga lufta, si dhe qytetarë të shumtë kanë bërë homazhe pranë trupit të tij në Teatrin e Qytetit të Gjilanit. Pas homazheve, është mbajtur mbledhja komemorative në nderim të veprës së Ramadanit, ndërsa më pas kortezhi është nisur drejt Kodrës së Dëshmorëve në Varrezat e Veteranëve të UÇK-së.
Ilmi Ramadani u dallua për përkushtimin e palodhur ndaj vlerave të lirisë dhe drejtësisë. Ai ishte bashkëveprimtar i Rexhep Malës dhe Nuhi Berishës, si dhe kontribuues i çmuar në veprimtarinë politike dhe kombëtare të Kosovës.
Për vdekjen e tij kanë reaguar shumë figura të njohura në Kosovë, përfshirë Partinë Demokratike të Kosovës dhe ish-kryeministrin Ramush Haradinaj, të cilët kanë shprehur ngushëllimet e thella dhe respektin për jetën dhe veprën e Ilmi Ramadanit.
Ramadani mbetet një figurë e respektuar mes bashkëluftëtarëve, miqve dhe qytetarëve që e njohën nga afër, duke lënë pas një trashëgimi të jashtëzakonshme në shërbim të atdheut.
