Kryetari i Nismës Socialdemokrate, Fatmir Limaj ka thënë se artikulli i publikuar me autorë Dimal Bashën dhe Jana Arsovska ka qenë një punim që fyen Kosovën, diasporën dhe luftën çlirimtare. Ai në prag të vazhdimit të seancës konstituive ka shprehur mirënjohjen e tij për gazetarin që ka hulumtuar dhe e ka bërë publikimin e atij punimi.
“Ai nuk është shkrim është një punim shkencor, që shërbehen studentë, profesorë, publicistë, prokurorë, propagandistë. Thjesht nuk është një artikull, një prononcim, një status, por është një shkrim shkencor, demek i bazuar, e i hulumtuar nga dy autorë profesionistë. Për më tepër besueshmërinë e atij shkrimi e jep, sepse njëri nga bashkautorët është shqiptar nga Kosova, pra i jep peshë atij hulumtimi”, ka thënë Limaj.
Ai tutje ka thënë se deri në vitin 2016 në vazhdimësi ka pasur hulumtime të tilla të porositura për të forcuar akuzat serbe e për të forcuar raportin e Dick Marty-t.
“Ka plotë artikull të tillë të cilët janë shkruar në atë kohë për demonizimin e luftës çlirimtare dhe pavarësinë e Kosovës, e sidomos keni parasysh në vitin 2010 kur ka qenë beteja për njohjen e pavarësisë së Kosovës, kur debati i madh ka qenë kontestimi i luftës çlirimtare. Në gjithë këtë kohë ka dalë edhe ky artikull si shumë të tjerë. Më vjen keq, shumë keq, që një shqiptar për ta publikuar një shkrim, një punim shkencor, vetëm për ta publikuar, ka fyer, ka ofenduar, ka rrënuar, ka shtrembëruar, e ka akuzuar vendin e vet, kombin e vet për ta botuar gjoja një punim shkencor, për t’i shërbyer atij vet personalisht”, ka shtuar Limaj.
Në pyetjen e gazetarëve nëse duhet të iniciohet shkarkimi i Dimal Bashës nga pozita e kryeparlamentarit, Limaj ka thënë se kjo çështje është shumë serioze dhe se ai punim fyen qindra mijëra mërgimtarë nga Kosova.
“Serioze është natyra. Artikulli është punim shkencor. Unë kam qenë në gjykata, punimet e tilla shkencore ne i kemi pasur në akuza të drejtpërdrejta nga organet ndjekëse për të sforcuar argumentet e tyre ndjekëse ndaj luftës çlirimtare. Por kjo nuk është thjesht ndaj luftës, ai artikull fyen gjithë diasporën e Kosovës. Qindra mijëra shqiptarë, që me sakrificë e kanë ndihmuar lirinë e Kosovës. Qindra mijëra shqiptarë që kanë mbajtur arsimin e shëndetësinë me mjete të veta në Kosovën e pushtuar dhe që kanë mbajtur gjallë rezistencës e Kosovës dhe që e kanë ndihmuar luftën çlirimtare të Kosovës dhe në fund ata i kthejnë dhe i bëjnë banda dhe rrjete të drogës. Ata njerëz që me mund dhe sakrificë kanë financuar Kosovën, këta në artikull i kthejnë gjoja rrjete të drogës e banda. Thjesht këtë e kemi parë në librin e bardhë të Serbisë, në punimet shkencore ruso-serbe, thjesht është në përputhje të plotë me atë çfarë ka bërë propaganda serbe dhe shërbimet sekrete ruso-serbe, për të demonizuar argumentet e pavarësisë dhe lirisë së Kosovës”, ka nënvizuar Limaj.
Ndëkohë, më herë kryeparlamentari Dimal Basha i ka quajtur “të ulëta” dhe të rreme akuzat se ka shkruar kundër UÇK-së në një artikull me një bashkëautore, 12 vjet më parë. Ai ka thënë se nuk mban përgjegjësi për asgjë që është shkruar kundër UÇK-së në atë artikull dhe se e mbështet luftën e Ushtrisë Çlirimtare.
Megjithatë, Limaj ka thënë se kur je bashkëautorë një një punim me dikë, do të thotë se pajtohesh me atë çfarë është shkruar.
