Ministri në detyrë i Financave, Hekuran Murati, ka thënë se Kuvendi sot e ka mundësinë të përmbyllë procesin e konstituimit duke zgjedhur edhe nënkryetarin e 5-të që sipas Kushtetutës duhet të jetë nga komuniteti serb.
Murati ka theksuar se para Kuvendit sot janë dy opsione të qarta: të votohet një nga 9 deputetët e Listës Serbe, që sipas tij do të nënkuptonte vendosjen e një personi të dirigjuar nga terroristi Milan Radojçiq në kryesinë e Kuvendit ose të mbështetet kandidatura e Nenad Rashiqit, një deputet serb që nuk është pjesë e Listës Serbe.
“Ne e kemi bërë të qartë që për cilindo nga Lista Serbe, e cila punon kundër Republikës së Kosovës, vota jonë është kundër,” ka deklaruar Murati.
Ai ka theksuar se Rashiq është i vetmi opsion i pranueshëm, duke shtuar se tani përgjegjësia bie mbi deputetët e opozitës.
“Për cilin opsion janë deputetët e opozitës?”, ka pyetur ai.
