Policia e Kosovës njofton se përmes Drejtorisë për Hetimin e Trafikimit me Narkotikë në Prishtinë, ka realizuar operacionin policor “Lugu”, duke arrestuar gjashtë persona të dyshuar dhe konfiskuar substanca narkotike.
“Sipas hetimeve intensive, gjashtë të dyshuar meshkuj kosovarë janë marrë me shit-blerje të substancave narkotike në rajonin e Prishtinës,” njofton Policia e Kosovës.
Operacioni u zhvillua më 06.08.2025, nën autorizimin e Prokurorisë Themelore dhe me urdhër të Gjykatës në Prishtinë, ku u kontrolluan tetë lokacione, përfshirë shtëpi, banesa dhe objekte përcjellëse. Policia u mbështet edhe nga Njësia Speciale Operative, Drejtoria e Teknikës Kriminalistike, njësia K9 dhe njësitë patrulluese nga rajoni i Prishtinës.
Si rezultat i këtij operacioni janë sekuestruar:
300 gramë kokainë (vlerë e përafërt 18,000 euro),
13,294 euro,
2 DVR,
5 vetura me targa vendore, si dhe prova tjera materiale.
Të dyshuarit janë shoqëruar për intervistim në prezencë të avokatëve mbrojtës dhe janë ndaluar për 48 orë me vendim të prokurorit.
“Policia e Kosovës mbetet e përkushtuar në parandalimin dhe luftimin e shpërndarjes së narkotikëve,” përfundon njoftimi.
