Policia e Kosovës ka parandaluar një rast kontrabandimi me speca në Kamenicë, duke ndaluar një automjet dhe sekuestruar rreth 1000 kilogramë mall pa dokumentacion të vlefshëm.
Policia e Kosovës njofton se ka ndërmarrë një veprim të suksesshëm për të parandaluar një rast kontrabandimi me mallra në fshatin Lisockë të Kamenicës. Njësitë patrulluese nga DRPK-Lindje ndaluan një automjet me targa vendore, drejtues i të cilit ishte një mashkull kosovar i dyshuar.
Gjatë kontrollit të automjetit, policia ka gjetur 92 pako me speca, me peshë totale rreth 1000 kilogramë dhe me vlerë tregu prej rreth 2,500 deri 3,000 euro, për të cilat i dyshuari nuk kishte dokumentacion të vlefshëm.
“Në lidhje me procedurat e mëtejme është njoftuar prokurori kujdestar me vendim të të cilit inicohet rasti, ndërsa mallrat dorëzohen në pikën doganore kompetente. Policia mbetet e përkushtuar në parandalimin dhe luftimin e të gjitha formave të krimit dhe falënderon qytetarët për bashkëpunimin e tyre”, thuhet në njoftim.
