Policia e Kosovës ka konfirmuar se ka kryer bastisje në shtëpinë shtetases serbe, e cila së bashku me të dashurin e saj, pjesëtar i forcave ajrore kroate, u arrestua në Kroaci nën akuza për spiunazh për Serbinë. Zëvendësdrejtori i Policisë për rajonin e Veriut, Veton Elshani, tha për RTKlive se bastisja u bë pas marrjes së informacionit për aktivitete të mundshme në vitin 2022.
Ai shtoi se pas verifikimit të lokacionit të shtëpisë, Policia gjeti disa sende që mund të lidhen me armë.
“Në momentin që ka dalë informacioni atje, për neve ka qenë mjaft interes, pasi është përmendur se në lokacione të caktuara, në disa komuna dhe vende në vitin 2022, ne kemi marrë veprimet e nevojshme për të verifikuar ku ndodhet adresa e saj. Gjetëm lokacionin e shtëpisë dhe morëm informacion se aty mund të ketë armë. Hyrëm dhe bastisëm shtëpinë, ku gjetëm një sprej, disa gëzhoja dhe fishekë”, tha Elshani për RTKlive.
Ndërkohë gjatë ditës, Prokuroria Speciale e Kosovës ka thënë për RTK se u ka dërguar kërkesë zyrtare autoriteteve të Kroacisë për sigurimin e provave në lidhje me arrestimin e shtetases serbe të Republikës së Kosovës, ndaj të cilës dhe partnerit të saj, Prokuroria e Qarkut në Split ka hapur hetim për spiunazh.
Prokuroria ka njoftuar se është në kontakt të vazhdueshëm me autoritetet përkatëse dhe do të ndërmarrë të gjitha veprimet ligjore të nevojshme në përputhje me marrëveshjet për bashkëpunim juridik ndërkombëtar.
“Lidhur me arrestimin e një shtetaseje të Republikës së Kosovës në Kroaci, ju njoftojmë se Prokuroria Speciale është në kontakt me autoritetet përkatëse. Tashmë Prokuroria u ka dërguar kërkesë zyrtare për sigurimin e provave autoriteteve të Kroacisë, në përputhje me marrëveshjet për bashkëpunim juridik ndërkombëtar. Prokuroria Speciale do të ndërmarrë të gjitha veprimet e nevojshme ligjore në lidhje me këtë çështje”, kanë thënë ekskluzivisht për RTK-në nga Prokuroria Speciale.
