Po bëhen pothuajse tri javë që ditë e natë qëndron pranë djalit të saj, Elvisit, i cili u godit nga një veturë në Bresje të Fushë Kosovës. Ibadete Hasani, nëna e 10-vjeçarit, flet për përjetimet e 10 gushtit, kur kuptoi që djalin e saj ia goditi vetura.
“Doli një polic e tha: a je në gjendje me hy te djali, a je e fortë? Thashë: valla s’po di çka me të thanë. Kur kam hy brenda në spital me pa, veç e di që kam thanë: a është djali jem, a kështu të paskan bë? Edhe ma nuk kam ditë ku jam, veç kur e kom pa vetën në korridor”, ka thënë nëna e Elvisit.
Ajo thotë se gjendja e djalit është e rëndë, për çka mjekët i kanë rekomanduar të qëndrojë në spital edhe një muaj.
“Kam ardhur unë këtu në intensiv, kom qëndruar 2 javë e dy ditë, se sot tri ditë këtu është djali që e kanë sjellë prej intenzive, po me ushqyer jo, asgjë jo, djali krejt me as s’e them më, as nuk din, as asgjë, vetëm shikon, sytë qel i mban, qatë frymë që merr se asgjë tjetër. Mjekët po mundohemi po thonë, po djali që ka pas gjakderdhje në kokë shumë, edhe po thonë e ka lënduar trurin e tash po këqyrin, po thonë që munden këtu mirë, që jo…?”, ka shtuar ajo.
Ndërkohë, në rrjete sociale është publikuar numri i xhirollogarisë ku qytetarët mund të dërgojnë para për shërimin e Elvisit, pasi sipas nënës së tij, po detyrohen të blejnë terapinë për trajtim në QKUK.
Për rastin gjatë ditës ka reaguar Shërbimi Spitalor dhe Klinik Universitar i Kosovës, sipas të cilit, fëmijës nuk i ka munguar asnjëherë kujdesi mjekësor.
“Është realizuar përpunim laboratorik dhe imazherik, si dhe janë kryer konsultime të shumta multidisiplinare (neurokirurg, neurolog pediatrik, oftalmolog, fiziatër). Pacienti ka marrë terapi antibiotike, antiepileptike, kortikoterapi, terapi fizikale dhe mbështetëse, ndërsa është ushqyer përmes sonde nazogastrike dhe është monitoruar vazhdimisht nga ekipi kujdestar”, thuhet në reagim.
E nga Policia e Kosovës kanë bërë të ditur se i dyshuari për goditjen e Elvisit është intervistuar.
“Lidhur me aksidentin, personi i dyshuar është intervistuar nga ana e policisë dhe lënda është përcjellë në prokurori për veprime të mëtejme, ku dhe mund të adresoni pyetjet tuaja për detaje”, ka thënë policia.
RTK ka pyetur edhe në Prokurorinë Themelore në Prishtinë nëse është ndërmarrë ndonjë masë ndaj të dyshuarit, apo çka ka ndodhë me rastin, por nuk kanë kthyer përgjigje nëse ngasësi i automjetit ndodhet në paraburgim apo është liruar.
