Kryetari i PDK-së, Memli Krasniqi, ka kujtuar sot 18-vjetorin e vrasjes së ish-policit të njohur të Kosovës, Triumf Riza. Ai e ka përshkruar Rizën si një shok dhe njeri të paharrueshëm, me karakter të fortë dhe vullnet të hekurt.
“Triumf Riza ishte shok e njeri i paharrueshëm – me karakter të fortë, vullnet të hekurt dhe afërsi njerëzore që e bënin të veçantë. Kështu e kujtoj që nga ditët e shkollës së mesme, ku dallohej për seriozitet, por edhe për miqësinë e vërtetë,” shkroi Krasniqi.
Ai kujtoi edhe kontributin e tij në Policinë e Kosovës, ku, sipas tij, ishte ndër policët më të aftë të brezit të parë në luftën kundër krimit të organizuar.
“Më 30 gusht 2007, jeta e tij u shua tinëzisht e pabesisht, duke lënë pas dhembje të pashuar për familjen dhe për të gjithë ne. Edhe sot, pas 18 vitesh, drejtësia ende nuk ka thënë fjalën e vet,” tha Krasniqi.
“Triumf, do të të kujtojmë përherë, me respekt e krenari, shok i dashur”, përfundoi ai.
