Instituti Hidrometeorologjik i Kosovës ka bërë të ditur se gjatë kësaj fundjave pritet mot i ndryshueshëm, me intervale me diell, vranësira të dendura dhe reshje shiu të shoqëruara me shkarkime rrufesh, sidomos sot. Në disa zona ekziston mundësia për stuhi të shkurtra me breshër. Moti sot do të jetë kryesisht i vranët, me periudha të shkurtra me diell.
Në pjesën e dytë të ditës, vranësirat do të dendësohen, duke sjellë reshje shiu dhe shkarkime rrufesh.
“Në zona të kufizuara parashihen edhe stuhi me breshër,” ka njoftuar IHMK, duke shtuar se edhe era do të jetë më e fuqishme në disa rajone.
Temperaturat minimale do të lëvizin ndërmjet 12 dhe 17 gradë Celsius, ndërsa maksimalet pritet të arrijnë nga 27 deri në 30 gradë Celsius.
Kurse nesër, moti do të jetë me diell dhe pjesërisht i vranët.
