Në kuadër të shënimit të 26-vjetorit të themelimit të Policisë së Kosovës, në Prishtinë është bërë vendosja e gurthemelit të memorialit kushtuar zyrtarëve policorë, si simbol nderimi dhe kujtimi për veprën dhe sakrificën e tyre që dhanë jetën në krye të detyrës.
Ceremonia u mbajt në lagjen “Dardania”, pikërisht në vendin ku 18 vjet më parë, më 30 gusht 2007, ra në krye të detyrës zyrtari policor Triumf Riza.
Drejtues të institucioneve shtetërore dhe të Policisë së Kosovës bënë homazhe përkujtimore pranë pllakës së ngritur në vendin e rënies së tij dhe më pas vendosën gurthemelin e memorialit, i cili do të kujtojë përherë sakrificën e zyrtarëve policorë të rënë në detyrë.
Kryeministri në detyrë, Albin Kurti, tha se Triumf Riza ishte jo vetëm një polic i guximshëm, por mbi të gjitha një njeri me vlera të larta dhe vendosmëri të rrallë.
“Triumf Riza, para se të ishte një polic i guximshëm, ishte një njeri i guximshëm. Kam pasur fatin ta njoh edhe personalisht, në këtë lagje ku kam banuar edhe vetë. Ai u vra mizorisht me një breshëri plumbash. Ishte vetëm 20-vjeçar, i sapo inkuadruar në polici, me dëshirën për t’i shërbyer rendit publik. Ishte i përkushtuar dhe pa kompromis,” theksoi Kurti.
Ministri në detyrë i Punëve të Brendshme, Xhelal Sveçla, deklaroi se institucionet e sigurisë dhe qeveria janë duke bërë të pamundurën që autorët e përfshirë në këtë krim të dalin para drejtësisë.
“Ministria, Policia dhe Qeveria po bëjnë gjithçka që është e mundur që njëri nga të akuzuarit në këtë rast të sillet para drejtësisë. Do të bëjmë çmos që ky dhe të tjerët të mos jenë larg duarve të organeve të drejtësisë,” tha ai.
Ndërkaq, Drejtori i Përgjithshëm i Policisë së Kosovës, Gazmend Hoxha, e përshkroi Rizën si një oficer shembullor, i cili u privua shumë herët nga jeta.
“Triumfi ka qenë një oficer shembullor. Dora kriminale ia ndërpreu jetën shumë herët dhe e pengoi në rrugën e tij të shërbimit dhe kontributit. Drejtësia ka dështuar që kriminelët të marrin dënimin e merituar, por ne do të punojmë me përkushtim që ata të dalin para drejtësisë,” shtoi ai.
Babai i Triumf Rizës falënderoi për gjithë kujdesin institucional ndaj të birit të vrarë 18 vite më parë.
Që nga themelimi i Policisë së Kosovës, 24 zyrtarë policorë kanë rënë gjatë kryerjes së detyrës, duke lënë pas një trashëgimi heroizmi dhe përkushtimi për vendin.
