Në Serbi, tabela me urime për ditëlindjen e udhëheqësit autoritar bjellorus Aleksandër Lukashenko u shfaqën në Beograd dhe Novi Sad më 30 gusht. Ai mbushi 71 vjeç të shtunën.
Në tabela, përveç urimeve, shkruhet “Serbia të do”. Urimet ishin nënshkruar “Ivan Ivanoviç – projekti konservator “Nashi”, raporton Shërbimi Ballkanik i Radios Liberty.
Deklarata e lëvizjes veren se Lukashenko është një “mik i sinqertë dhe i madh i popullit serb” dhe se Republika e Bjellorusisë “ka qenë gjithmonë aty” gjatë momenteve më të vështira për Serbinë.
Projekti Nashi është një organizatë e ekstremit të djathtë që nuk është regjistruar zyrtarisht në Serbi. Është e njohur për mbështetjen e saj të hapur për luftën e Rusisë kundër Ukrainës, kundërshtimin e saj ndaj integrimit evropian të vendit dhe retorikën e saj anti-migrante dhe anti-LGBT.
Ky nuk është veprimi i parë i Nashit në mbështetje të Lukashenkos. Shkurtin e kaluar, Beogradi u mbush me postera ku shkruhej “Serbia mbështet Lukashenkon”. Në vitet e fundit, aktivistët e lëvizjes kanë shpërndarë gjithashtu postera në mbështetje të Presidentit rus Vladimir Putin.
Projekti Nashi lindi nga Lëvizja Popullore Serbe Nashi, gjithashtu një organizatë e paregjistruar. Në vitin 2012, zyra e prokurorit u përpoq ta ndalonte atë, duke e akuzuar për nxitje të urrejtjes dhe diskriminimit kombëtar, fetar, racor dhe seksual. Por Gjykata Kushtetuese vendosi se nuk kishte arsye për të ndaluar aktivitetet e saj.
Aleksandër Lukashenko mbetet një nga aleatët e paktë të Presidentit rus Vladimir Putin. Serbia i është bashkuar në mënyrë selektive regjimit të sanksioneve. Beogradi ka mbështetur kufizimet kundër Minskut, por refuzon të vendosë masa të ngjashme kundër Moskës.
