Nën sloganin “Kur bota hesht, ne nisim lundrimin”, një flotilje ndihme humanitare, e udhëhequr nga aktivistja suedeze Greta Thunberg, do të niset sot nga Barcelona në një përpjekje për të “thyer bllokadën e paligjshme të Gazës”, thanë organizatorët.
Anijet do të nisen nga qyteti port spanjoll për të “hapur një korridor humanitar dhe për t’i dhënë fund gjenocidit të vazhdueshëm të popullit palestinez”, deklaroi Flotilja Globale Sumud.
Numri i anijeve pjesëmarrëse dhe as ora e saktë e nisjes nuk janë specifikuar.Flotilja pritet të mbërrijë në enklavën bregdetare të shkatërruar nga lufta në mesin e shtatorit. “Ky do të jetë misioni më i madh i solidaritetit në histori, me më shumë njerëz dhe më shumë anije sesa të gjitha përpjekjet e mëparshme së bashku”, tha aktivisti brazilian Thiago Avila.
Organizatorët thonë se dhjetëra anije të tjera pritet të largohen nga portet në Tunizi dhe vende të tjera mesdhetare më 4 shtator. Aktivistët gjithashtu do të organizojnë demonstrata dhe protesta të tjera të njëkohshme në 44 vende “në solidaritet me popullin palestinez”, shkroi Thunberg, një anëtare e komitetit drejtues të flotiljes, në Instagram.
Përveç Thunberg, flotilja do të përfshijë aktivistë nga disa vende, parlamentarë evropianë dhe figura publike si ish-kryetarja e bashkisë së Barcelonës, Ada Colau.
