Presidentja e Bankës Qendrore Evropiane (BQE), Christine Lagarde, paralajmëroi sot se hapat që po ndërmerr Presidenti i SHBA-së, Donald Trump, për të shkarkuar Kryetarin e Rezervës Federale të SHBA-së (Fed), Jerome Powell, dhe Guvernatoren e Fed, Lisa Cook, përbëjnë “një rrezik shumë serioz për ekonominë amerikane dhe globale”.
Rezerva Federale, institucioni i autorizuar për të rregulluar dhe kontrolluar institucionet dhe tregjet financiare dhe monetare në SHBA, u themelua në vitin 1913. Trump e ka sulmuar vazhdimisht Powellin për mosrespektimin e thirrjeve për të ulur normat e interesit me qëllim nxitjen e rritjes ekonomike, duke e quajtur atë “Z. Tepër Vonë” dhe duke e kërcënuar se do ta shkarkojë nga puna.
“Do të ishte shumë shqetësuese nëse politika monetare e SHBA-së do të varej nga diktatet e një personi”
Guvernatorja Lisa Cook, një nga shtatë anëtarët e Bordit të Guvernatorëve të Rezervës Federale, është kritikuar gjithashtu nga Trump dhe përpjekja e tij për ta shkarkuar atë. Vendimi i tij për ta shkarkuar Cook tani është në gjykatë.
“Në rast se politika monetare amerikane pushon së qeni e pavarur dhe në vend të kësaj varet nga diktatet e këtij apo atij personi, besoj se ndikimi në stabilitetin e ekonomisë amerikane, si rezultat i efekteve që kjo do të kishte në të gjithë botën, do të ishte shumë shqetësues sepse është ekonomia më e madhe në botë”, tha Lagarde për Radio Classique.
Ajo gjithashtu kujtoi vendimin e javës së kaluar nga një gjykatë apeli amerikane se shumica e tarifave të vendosura nga Trump ishin të paligjshme, duke shtuar se vendimi paraqet pasiguri shtesë për parashikimet ekonomike në nivel global.
