Numri i të vdekurve nga tërmeti i fuqishëm me magnitudë 6.0 që goditi një sërë qytetesh në provincën Kunar, pranë qytetit të Jalalabadit në Afganistan, është rritur në mbi 800, sipas një raporti të ri nga autoritetet. Më shumë se 1,500 persona janë plagosur.
Zyrtarët qeveritarë talibanë u kanë kërkuar organizatave humanitare të ndihmojnë në përpjekjet e ndihmës në zonat e largëta malore të prekura nga tërmeti.
Shefi i policisë së provincës Kunar i tha BBC-së se rrugët që të çojnë në zonë janë të bllokuara për shkak të rrëshqitjeve të dheut të shkaktuara nga përmbytjet dhe lëkundjet pas tërmetit. Zyrtarët talebanë thonë se kanë burime të kufizuara dhe po u kërkojnë organizatave ndërkombëtare ndihmë për të siguruar helikopterë për të arritur në zonat e prekura.
Mjeku afgan: ‘Një pacient çdo pesë minuta për shkak të tërmetit’
Spitali provincial në Asadabad, kryeqyteti i provincës Kunar të Afganistanit, pranoi “një pacient çdo pesë minuta” gjatë gjithë natës pas tërmetit të fuqishëm që goditi Afganistanin lindor, duke vrarë të paktën 622 persona dhe duke plagosur 1,500 të tjerë. Mjeku kryesor i spitalit, Dr. Muladad, e raportoi këtë, duke vënë në dukje se i gjithë spitali është i mbushur me të plagosur. Sipas mjekut, të cituar nga BBC, 188 të plagosur, përfshirë gra dhe fëmijë, janë sjellë në qendrën shëndetësore në orët e fundit, me pacientët të detyruar të shtrihen në dysheme pasi shtretërit mbaruan. Muladad e përshkroi situatën si një “krizë të papritur” dhe shpalli një emergjencë spitalore. Sipas Muladad, deri më tani katër trupa janë transportuar në objekt, ndërsa dhjetëra të tjerë janë transportuar në klinika të tjera lokale. Ndërkohë, gati 250 të plagosur janë transportuar në spitalin kryesor në provincën fqinje Nangahar.
Tërmeti i së dielës në mbrëmje, me magnitudë 6.0 ballë
Një tërmet me magnitudë 6.0 ballë të shkallës Rihter goditi Afganistanin lindor të dielën në mbrëmje, në kufi me Pakistanin, sipas autoriteteve lokale. Epiqendra e tërmetit, i cili ndodhi në orën 23:47 sipas kohës lokale (21:17 GMT) në një thellësi prej 8 kilometrash, ndodhej 42 kilometra nga Jalalabadi, sipas Shërbimit Gjeologjik të SHBA-së. Gazetarët e Agjencisë Franceze të Shtypit i ndjenë dridhjet në Kabul për disa sekonda, si dhe në Islamabad të Pakistanit, 370 kilometra larg në vijë ajrore.
Tërmetet e mëparshme
Afganistani është i prirur ndaj tërmeteve vdekjeprurëse, veçanërisht në vargmalin Hindu Kush, ku takohen pllakat tektonike indiane dhe euroaziatike. Një tërmet me magnitudë 6.3 goditi Afganistanin më 7 tetor 2023, i ndjekur nga lëkundje të forta pasuese. Qeveria talebane vlerësoi se të paktën 4,000 persona vdiqën, ndërsa Kombet e Bashkuara vlerësuan një numër shumë më të ulët vdekjesh prej rreth 1,500. Ishte katastrofa natyrore më vdekjeprurëse që ka goditur Afganistanin në historinë e kohëve të fundit. Në qershor 2022, një tërmet me magnitudë 5.9 goditi provincën e varfër kufitare lindore të Paktikës, duke vrarë më shumë se 1,000 persona dhe duke lënë dhjetëra mijëra të pastrehë. Në vitin 2015, më shumë se 380 persona u vranë në Pakistan dhe Afganistan kur një tërmet i fuqishëm me magnitudë 7.5 ballë i shkatërroi të dy vendet, me shumicën e viktimave në Pakistan. Në atë katastrofë, 12 vajza të reja afgane u vranë në një rrëmujë ndërsa përpiqeshin të largoheshin nga ndërtesa e shkollës së tyre gjatë dridhjeve.
