Ambasadori i SHBA-së në NATO, Matthew G. Whitaker, tha të martën se SHBA-të po e monitorojnë nga afër situatën në Serbi dhe Bosnjë e Hercegovinë, me qëllim që të mos lejojnë zhvillimin e ngjarjeve që mund të çojnë në një konflikt rajonal.
“Po ndjekim me shumë kujdes gjithçka që po ndodh si në Republikën Srpska ashtu edhe në Serbi. Aktualisht jemi të përqendruar në sigurimin që situata të mos përshkallëzohet në një konflikt të mundshëm rajonal”, tha Whittaker në një nga panelet e Forumit Strategjik të Bledit, raporton RSE .
Ai theksoi se SHBA-të “dëshirojnë stabilitet në Ballkanin Perëndimor” dhe se kjo, tha ai, është gjithashtu e rëndësishme për partnerët evropianë brenda NATO-s, të cilët “kanë detyrim të veprojnë së bashku në situata krize”.
Në Republikën Srpska, ish-presidenti Milorad Dodik po e konteston vendimin e gjykatës së BiH-së, e cila ia hoqi mandatin presidencial pas dënimit të tij, dhe ka kërcënuar vazhdimisht se do ta ndajë atë entitet nga pjesa tjetër e BiH-së.
Kur u pyet nëse NATO do të ndërhynte nëse kriza politike do të përshkallëzohej në një konflikt të armatosur, veçanërisht në BiH, por edhe në Serbi, Whittaker tha se NATO vepron unanimisht, por shtoi se “jemi larg kësaj”.
“Nëse NATO do të përfshihet… Rregulli numër një në politikë është të mos veprosh mbi bazën e supozimeve. Mendoj se duhet të shohim se si do të zhvillohen gjërat”, tha Whittaker.
Ambasadori amerikan tha gjithashtu se “NATO është më e fortë se kurrë” dhe se “kjo duhet të jetë shumë shqetësuese për kundërshtarët tanë”.
Kur u pyet nëse Presidenti i SHBA-së Donald Trump mund të takohet me Vuçiçin ose Dodikun, Whittaker tha se nuk ka indikacione për takime të tilla, por se ato mund të diskutohen nëse ka përfitime të qarta për paqen dhe stabilitetin.
Ai tha se Trump ka një aftësi të veçantë për të komunikuar me udhëheqësit botërorë, për të përdorur ndikimin e presidencës amerikane dhe fuqinë e shtetit, në favor të paqes, demokracisë, stabilitetit dhe zhvillimit ekonomik.
“Sigurisht që nuk do të pranoja një takim që synon forcimin e pozicionit politik të ndonjë udhëheqësi. Kjo nuk është ajo që po bën Presidenti Trump”, tha ambasadori i SHBA-së në NATO.
Ai e përshkroi Trumpin si një “paqebërës”, duke vënë në dukje se politikat e tij përqendrohen në rezultate dhe në krijimin e mundësive për përparim.
